Ioh kup ka samla Bahun Nongrum ia ka pansngiat ‘Miss Meghalaya’, ka Fortunate Mika Dkhar ia ka ‘Miss Teen 2024’

Syllad | The Rising MeghalayaAugust 5, 2024

Ka samla Bahun Nongrum ka la ioh ban kup ia ka pansngiat thei bhabriew “Miss Meghalaya” katba ka samla Fortunate Mika Dkhar ka la ioh ia ka pangnsgiat ‘Miss Teen Meghalaya 2024,’ ha ka rynsan iakop ba la pynlong ha ka 3 tarik mynta u bnai ha Lariti Multipurpose Hall, Mawkasiang.

Katba ka samla Chaivalry Lartang bad ka samla Lily Kharthangmaw kila jop ha ka 1st bad 2nd runners-up ha kane ka jingiakop thei bhabriew.

Ka samla Bahun mynta kan ioh ban mihkhmat ia ka Meghalaya sha ka “Miss Universe India 2024,” katba ka samla Chaivalry bad ka samla Lily kin leit mihkhmat ia ka Meghalaya ha ka “Miss Northeast 2024” ka ban long ha Itanagar, Arunachal Pradesh.

Katba ha ka kyrdan ka Miss Teen, ka samla Palei Chyne bad ka samla Nikita Nongrum  kila wan ha ka 1st bad 2nd runners-up. Ka samla Fortunate kaba jop ia ka ‘Miss Teen’ kan ioh leit mihkhmat ia ka Meghalaya sha ka rynsan “Miss Teen Diva” ka ban long ha Jaipur, Rajasthan.

Ia kane ka rynsan la pynshongkun shuh shuh da ka jingiadon lang u Myntri ka tnad Tourism u Bah Paul Lyngdoh, kumjuh u bah Sanbor Shullai, Chairman ka Meghalaya Tourism Development Corporation (MTDC) nalor u bah Frederick Roy Kharkongor, Principal Secretary ka tnad Arts and Culture bad kiwei kiwei.

Ki nongbishar ha kane ka jingiakop ki kynthup ia u Amjad Khan, Director ka Operations and Marketing for Miss Universe India; ka Arshina Sumbul, Miss Grand International India 2023; ka Divija Gambhir, State Director for Miss Universe Rajasthan bad Miss India Multinational 2021; bad u Mele Pucho, State Director for Miss Universe Nagaland.

Ka lahduh ha ‘Miss Meghalaya 2024’  ka ioh ia ka khusnam T. 1 lak, katba kaba long baar ka ioh T. 50,000 bad kaba balai T. 25,000.

Ka lahduh ka Miss Teen Meghalaya 2024 ka ioh T. 25,000 katba kaba long baar ka ioh T. 15,000 bad kaba lai T. 10,000.

Ia kane ka rynsan la kyrshan da ka Meghalaya Tourism bad ka tnad Arts and Culture jong ka Meghalaya.

Kiwei pat ki nongjop ha ki kyrdan bapher bapher ka Miss Meghalaya ki long ka samla Jingieit U-Ai Timung ia ka Miss Rampwalk, ka samla Dorachiva Daw ia ka Miss Congeniality, ka samla Chaivalry Lartang ia ka Best Outfit, samla Christine Anaiah Nongrum ia ka Miss Beautiful Smile, samla Ibadonbokshisha Marwein ia ka Miss Personality, samla Rimika Dkhar  ia ka Miss Talented, bad ka samla Bahun Nongrum ia ka Miss Perfect 10.

Ha kiwei ki kyrdan jong ka Miss Teen Meghalaya kiba jop ki long ka samla Nikita Nongrum ia ka Miss Talented, samla Aranza Yamini Pariat ia ka Miss Congeniality, bad ka samla Palei Mynsiem Chyne ia ka Miss Popular.