Ioh kurup ka tnat ANTF East Jaintia Hills ia ki dawai kuli pynbuaid ba khia haduh 191.88 gram

Syllad | The Rising MeghalayaMay 30, 2024

Ka Tnat ANTF ka East Jaintia Hills ha ryngkat ki pulit ka Tnat Traffic ka Khliehriat ki la ioh ban kurup haduh 2000 tylli ki dawai kuli pynbuaid ba la tip kum ki Yaba Tablet kiba khia haduh 191.88 gram napoh Khliehriat bad kem noh ia arngut ki briew kiba donkti.

Na ka liang u Superintendent of Police, East Jaintia Hills u pyntip ba ki pulit hadien ba ki la ioh ia ka jingtip kaba bniah halor ka jingdon jong ki arngut ki briew kiba wan ryngkat ki jingdih pynbuaid napoh Assam ban leit sha Shillong, kumta ki la pynlong ka jingpynap shrip bad ha ka por kumba 1:00 mynstep jong ka 29 tarik Jymmang bad ioh bat noh ia kawei ka kali.

Ha ka jingtalasi ki pulit ki la ioh ban kurup noh ia kine ki dawai kuli pynbuaid kiba khia haduh 191.88 gram bad kem noh ia kine ki briew kiba donkti ia kiba la tip kyrteng kum u Sumit Kumar Sinha 39 snem rta uba shnong New Majai, Bholaganj, East Khasi Hills, bad u Rabinda Deka 27 snem uba dei na Marigaon, Assam.

Na ka liang ki pulit ki rejister case pyrshah ia kine ki arngut hapoh ki kyndon jong ka NDPS Ac bad ka jingtohkit mynta ka dang iaid shakhmat.