Ioh kurup ki BSF haduh 74,000 kilo ka shini ba thmu khaii tuh sha Bangladesh, shah kem 2 ngut

Syllad | The Rising MeghalayaAugust 26, 2024

Ki shipai Border Security Force (BSF) ka Meghalaya ha ryngkat ka jingiatreilang bad ki bor pulit ka thain ha ka 24 tarik Nailar ki la lah ban pynpulom noh ia ka jingthmu khaii tuh ia shibun bah ka shini shapoh Bangladesh lyngba ki jaka khappud.

Kane ka la wan long ruh hadien ba ki BSF bad ki bor pulit ki la lapdien ia ki laitylli ki kali kiba kit ia shibun bah ka shini ha kaba ki la kem noh ia arngut ki nong India kiba donkti na ki bynta khappud jong ka shnong Lyngkhat, East Khasi Hills.

Ha kane ka jingkhynra ki BSF ki la lapdien ia kitei ki laitylli ki trok kiba kit haduh 74,000 kilo ka shini na katei ka thain khappud jong ka ri, bad ha ka jingtohkit, ki nongniah jong kine ki kali kim shym la lah ban pyni ia ki kot ki sla kiba biang kiba iadei bad ka jingkit ia kane ka mar.

Kumta na ka liang ki BSF ki la kem noh ia kine ki arngut bad kurup noh ia kane ka shini bad kali bad aiti noh sha ki bor pulit ka Pynursla police station ban bteng shuh shuh ia ka jingtohkit.

Lah ban kdew ba na ka liang ki shipai BSF ki dang iai bteng ban pynjur ia ka jingpahara ha baroh ki thain khappud jong ka ri  khamtam hadien ka jingjia jong ka jingkhihwin sain pyrthei hapoh ka ri Bangladesh ha kaba ki la don bun bah ki briew kiba la pyrshang ban wan phet sha India lyngba ki jaka khappud.