Ioh kurup ki BSF haduh15,000 kilo ka shini bad dawai ba shongdor 14 lak ba thmu khaii tuh sha Bangladesh

Syllad | The Rising MeghalayaMarch 1, 2024

Ki shipai Border Security Force (BSF) Meghalaya ha ki jingkhynra kiba ka la pynlong ha ka 29 tarik u Rymphang ba la dep ki la lah ban pynpulom ia kiba bun tylli ki kam khaii tuh ha ki bynta khappud ka India-Bangladesh, kata da kaba ioh ban kurup shibun bah ka shini nalor ki dawai dashin bad ka pisa India.

Hadien ba la ioh ia ka jingtip kaba bniah ki shipai BSF ki la pynlong ka jingkhynra hajan Kanta, Umsyiem East Khasi Hills ha kaba ki la ioh ban kurup haduh 15,000 kilo ka shini ia kaba la thmu ban khaii tuh shapoh Bangladesh.

La ong ruh ba ki runar ki bym lah ban ithuh kiba rieh hapoh ka jaka khlaw ki la ther maw bad kren kynthoh pyrshah ia ki BSF katba ki dang pynhiar ia ka mar ba l kurup, hynrei donbok kam shym la don kano kano ka jingmynsaw, hynrei ka la don ka jingjulor ia ka kali ki BSF. Hadien la aiti noh ia kane ka shini ba la ioh kurup sha ki bor pulit ka thain na ka bynta ban leh shuh shuh ia kaba donkam.

Ha kawei pat ka jingkhynra, ki shipai BSF na ka thain khappud ka BOP Naljuri ki la ioh ban kurup shibun bah ki dawai dashin kiba kot sha ka T.14 lak ia kiba la thmu ban khaii tuh shapoh Bangladesh lyngba ki jaka khappud ka West Jaintia Hills.

Nalor kine ki jingkhynra, ki BSF ka BOP Rajapara 193 Bn ki la sakhi ia ki suba runar napoh Bangladesh sha shiliang khappud bad hadien ba ki la leit ban tur, kine ki suba runar nong Bangla ki la phet krad noh shapoh Bangladesh da kaba shim kabu hapdeng ka jingdum bad ka jinglong riat bad khlaw ka jaka.

Hadien ba ki BSF ki la pynlong ia ka jingkhynra ki la ioh ban kurup ia kawei ka pla kaba don ka pisa India 7 lak tyngka, bad hadien la aiti noh ia kane ka pisa sha ki bor pulit ka Gumaghar PS bad la ujor ruh da ka FIR na ka bynta ban pynlong shuh shuh ia ka jingtohkit.

Shuh shuh la suba jur ba kane ka pisa India ka dei kaba don jingiadei bad ki jingsiew na ka bynta ki mar ba khaii tuh na India shapoh Bangladesh.