Ioh kurup ki BSF ia ka shini bad ki tiar ba thmu khaii beaiñ sha Bangladesh

Syllad | The Rising MeghalayaDecember 3, 2023

Ha kawei pat ka jingjop ha ka jingiakhun pyrshah ia ki kam beain ha ki thain khappud, ki shipai BSF ka Meghalaya ha ka 1 tarik Nohprah, ki la lapdien ia kawei ka trok kaba kit shibun bah ka shini ia kaba  thmu ban shalan beain shapoh Bangladesh.

Kane ka trok kaba don ia u registration number ML 04 C 5133, ka la shah bat noh ha ki shipai BSF kiba la pynap shrip, kata hadien ba ka la wan na ka thain Sonapur bad iaid lyngba na ka surok Lumshnong – Sonapur sha ka lynti surok ka thain Lailong – Huroi ha East Jaintia Hills.

Hadien ba la pynieng ia kane ka trok, ki shipai BSF ki la pynlong ka jingtalasi bad lap ba ia ka shini la buhrieh ha ki song ba la tap da u shyiap hapoh jong ka trok. Hadien la kem noh ia u nongniah jong kane ka kali namar ka jingbym lah ban pyni ia ki kot ki sla kiba biang bad halor ka jingpyrshang ban buhrieh ia ki jingshisha.

Ha kawei pat ka jingkhynra, ki shipai BSF ka jylla ki la ioh ban kurup noh ia shibun bah ki tiar kiba shongdor haduh kumba T.28 lak, ia kiba la thmu ban shalan beain shapoh Bangladesh.    

Ia utei u briew ba la ioh kem bad ia ki mar ba la ioh kurup la aiti noh sha ki bor pulit ka Umkiang PS na ka bynta ban leh shuh shuh ia kaba donkam.