Ioh kurup ki BSF ia khyndai tylli ki kulai ba thmu shalan beaiñ sha Bangladesh

Syllad | The Rising MeghalayaJuly 20, 2023

Hadien ba la ioh ia ka jingtip kaba bniah, ki shipai Border Security Force (BSF) na ka tnat 172 Bn haka sngi Balang ki la ioh ban kurup noh ia khyndai tylli ki kulai napoh kawei ka trok ia kiba la thmu ban shalan beaiñ shapoh Bangladesh lyngba ki jaka khappud ka East Jaintia Hills.

Kane ka la wan long hadien ba ki shipai BSF ki la pynlong ka jingpynap shrip hajan ka surok National Highway-06 ha Sonapur bad pynieng noh ia kane ka trok kaba don hapdeng ka jingsuba.

Hynrei, la ong ba kane ka trok kam shym la ieng satia hynrei ka la phet krad na kane ka jaka da kaba pynher sted sha ki thain Umkiang. Kane kala pynlong ia ki BSF ba kin pynlong ka jingbehthong bad lap satang ia ka kali kaba la pynieng hajan ka petrol pump hapoh Umkiang katba u nongniah u la phet krad noh na kane ka jaka.

Hadien ba ki la pynlong ia ka jingtalasi, ki BSF ki la lapdien ia ki khyndai tylli ki kulai ia kiba la thmu ban shalan beain shapoh Bangladesh.

Ia kine ki kulai bad ka kali ba la ioh kurup hadien la aiti noh sha ki bor pulit ka thain ba kin leh shuh shuh ia kaba donkam.