Ioh kurup ki BSF ia ki tiar kiba shongdor palat T.49 lak na ki bynta khappud ka EKH

Syllad | The Rising MeghalayaJanuary 26, 2025

Ki shipai Border Security Force (BSF) na ka 04 Battalion hadien ba ki la ioh ia ka jingtip kaba bniah ki la ioh ban kurup noh ia shibun bah ki jingtah jingsleh pynbhabriew kiba thmu ban khaii beain kiba shongdor haduh kumba T.49.5 lak na ki bynta jong ka Nayabazar ha East Khasi Hills kaba don khappud ka Bangladesh

Ia kine ki tiar la ioh ban kurup noh ha ka janmiet jong ka 25 tarik Kyllalyngkot ia kiba la buhrieh hapoh kawei ka jaka khlaw kaba don ha ki jaka khappud ki bym pat shym la ker sainar.

La iathuh ruh ba ia kine ki tiar la buhrieh da ki nongkhaii tuh da ka jingthmu ban khaii beain shapoh Bangladesh da kaba shim kabu ia ka jingdum ha ka por mynmiet. Kine ki jait tiar kiba duna dor la ong ba ki dei kiba jur bha ka jingdawa hapoh Bangladesh. Kane ka jingdawa ka la lam ruh ha kine ki kam khaii tuh kiba jia na ka por sha ka por lyngba ki jaka khappud.

Hadien ia kine ki tiar ba la ioh kurup la aiti noh sha ka ophis ka Tnad Custom ha Pynursla na ka bynta ban pynlong shuh shuh ia ka jingtohkit bad ban leh ia kaba donkam.

Na ka liang ki shipai BSF ki dang iai bteng ban pynjur ia ka jingpahara ha shilynter ki jaka khappud jong ka ri da ka jingthmu ban khanglad ia kam beain kiba dang iai bteng lyngba ki jaka khappud jong ka ri da kaba kyntu ruh ia ki nongshong shnong ha ki thain khappud ba kin pyntip halor kino kino ki jingsuba kam bymman sha ki bor ba dei khmih bad ban bteng ban ai ka jingkyrshan ha ka jingpyrshang ban pynneh ia ka shongsuk shongsain.