Ioh kurup ki BSF ia u drok Yaba tablet bad ki masi na WJH bad SGH

Syllad | The Rising MeghalayaMarch 30, 2025

Ki shipai Border Security Force (BSF) na ka 144 battalion Meghalaya ha ka 28 tarik Lber hadien ba la ioh ia ka jingtip kaba bniah ki la pynlong ka jingkhynra ha ki bynta khappud kiba hap hapoh South Garo Hills district ha kaba ki la ioh ban kurup noh ia haduh 285 tylli ki dawai kuli Yaba tablets.

Ha kane ka jingkhynra ka kynhun ki BSF ki la pynlong ka jingtalasi kaba jur ha katei ka jaka bad lapdien ia kawei ka plastik iong ba la buhrieh hajan uwei u dieng. Hadien ba la jurip bniah la sem ba ki don haduh 285 tylli ki kuli Yaba tables ba ju pyndonkam da kiba kyrni drok ia kiba la thmu ban khaii tuh shapoh Bangladesh.

Hadien ia une u drok la aiti noh sha ki bor pulit ka Gasuapara Police Station, SGH na ka bynta ban pynlong shuh shuh ia ka jingtohkit bad leh ia kaba donkam.

Ha kawei pat ka jingkhynra ki BSF ha ka step jong ka 28 tarik Lber ki la ioh ban pyllait noh ia 19 tylli ki masi najan ki bynta khappud jong ka ri na West Jaintia Hills District ia kiba la thmu ban khaii tuh shapoh Bangladesh.

Hadien ia kine ki masi la leit ban aiti noh shapoh Police Station na ka bynta ban leh ia kaba donkam.