Ioh kurup ki BSF shibun bah ki tiar bad pynpulom ia ka jingthmu khaii tuh ia ki masi

Syllad | The Rising MeghalayaApril 12, 2025

Ki shipai Border Security Force (BSF) Meghalaya ha ka 10 tarik Iaiong ki la ioh ban kem noh ia ar ngut ki nong India ha ryngkat shibun bah ki mar ba la pynkit da ka kali hajan ki bynta khappud ka East Jaintia Hills.

Ha ka jingtohkit u nongniah jong ka kali um shym la lah ban pyni ia ki kot ki sla kiba biang kiba iadei bad kine ki mar. Kumta ruh na ka liang ki BSF ki la kem noh ia kine ki arngut bad kurup noh ia ki mar bad ka kali ia kiba la aiti noh sha Police Patrolling Post ha Umkiang, EJH ban leh shuh shuh ia kaba donkam.

Ha kawei pat ka jingkhynra, ki BSF ki la ioh ban pynpulom noh ia ka jingthmu khaii tuh ia ki masi da kaba ioh ban pyllait noh haduh 23 tylli ki masi ia kiba la eh ha kawei ka jaka ba long khlaw hajan khappud bad ka Bangladesh.

Ia kine ki masi la ong ba la pynpoi lyngba ka lynti surok sha ka thain khappud da ka jingthmu ban khaii beain shapoh Bangladesh.

Na ka liang ki shipai BSF ki dang iai bteng ban pynjur ia ka jingpahara ha ki jaka khappud jong ka ri bad ban khanglad ia kiba bun ki kam bymman kynthup ia ka jingwan rungtuh na shiliang khappud.