Ioh kurup ki pulit East Jaintia Hills bun bah u drok heroin, shah kem arngut

Syllad | The Rising MeghalayaSeptember 15, 2023

Ki pulit na ka tnat Anti Narcotic Task Force (ANTF) ka East Jaintia Hills haka step sngi Thohdieng ki la ioh ban kurup ia u drok heroin uba don 559.76 gram ha kaba la kem noh ia arngut ki briew kiba donkti na ki bynta jong ka shnong Nongsning, EJH.

U Superintendent of Police ka East Jaintia Hills, u Jagpal Dhanoa lyngba une u kyrwoh u la ong ba hadien ba kila ioh ia ka jingtip kaba bniah na ka liang ka tnat ANTF ka la ioh ban bat noh ia ki artylli ki kali tourist kiba wan na Mizoram halor ka jingsuba kit ia ki jingdih kiba beain.

U la ruh ba kane ka jingioh kurup ka la wan long hadien ba ki pulit ka ANTF ha ryngkat ki staff jong ka Umtyra Check gate nalor ki pulit ka Khliehriat PS hapoh ka jingialam jong u Additional Superintendent of Police ka EJH, u bah Banraplang Jyrwa ki la pynlong ka jingtalasi hapoh ka shnong Nongsning ha EJH hadien ba ki la sakhi ia kitei ki artylli ki kali ha ka por kumba 8:30 mynstep.

Hadien ka jingtalasi nyngkong ia ka kali kaba wan nyngkong ka Tata Sumo kaba don ia u Nom ML-05-M-1597 ha ryngkat ka jingdon lang ki sakhi ba laitluid la ioh kurup ia sawtylli ki song sabon ia kiba la buhrieh ia une u drok uba don ka jingkhia kaba 43.33 gm, bad hadien ka jingkhynra ia kawei pat ka Tata Sumo kaba don ia u No MZ-01-K-3872 la ioh ban kurup sa 44 tylli ki song sarbon kiba don ia une u juh u jingdih uba don ka jingkhia kaba 516.43 gm, kata ia kaba la pynthikna hadien ba la test ia ki.

Kine ki briew kiba la shah kem noh ki dei kiba la tip kyrteng kum u Lorence Zomuanpuia 32 bad u Lalmalsawa 36 snem rta. Na kine ki pulit ki la ioh ruh ban kurup noh ia ka pisa T,2,200 kynthup ia artylli ki mobile phone.

Hadien kane la rejistar case hapoh ki kyndon jong ka NDPS Act hapoh Khliehriat PS bad ka jingtohkit mynta ka la iaid shakhmat ban lapdien ia kiwei pat kiba donkti.