Ioh kurup ki pulit EJH haduh 2 kilo u drok Amphetamine, shah kem uwei

Syllad | The Rising MeghalayaNovember 1, 2023

Ki bor pulit ka East Jaintia Hills haka step sngi Balang ki la ioh ban kurup haduh 2.771 kilo u drok Amphetamine tablet bad  kem noh ia u briew uba donkti na  Datsympein, Ladrymbai, East Jaitnia Hills District.

Une u briew  ia uba la tip kyrteng kum u Sanju Singh uba shong ba sah ha Harijan Colony, Shillong u la shah kem noh katba u dang wan da ka bus night super kaba don ia u nombor (AR 20 9990) kaba mih na Silchar da ka jingthmu ban wan sha Shillong ha ryngkat kine ki jingdih pynbuaid.

U Superintendent of Police ka East Jaintia Hills District, u Jagpal Singh Dhanoa u la ong ba ki bor pulit hadien ba ki la ioh ia ka jingtip kaba bniah ki la pynlong ka jingpynap shrip hapoh Datsympein, Ladrymbai Datsympein ha ka por 5 baje mynstep hadien ba ki la bat noh ia katei ka bus night super.

Ki pulit hadien ba ki la pynlong ia ka jingtalasi ia ka pla jong u Sanju, ki la ioh ban kurup noh haduh 2.771 kilo u dawai kuli pynbuaid Amphetamine tablet ba beain.

Hadien ki pulit ki la kem noh ia u Sanju bad rejistar case hapoh Khliehriat police station. Mynta ka jingtohkit ka la iaid shakhmat khnang ban lapdien ia kiwei kiwei pat kiba donkti ha kine ki kam beain, ong u heh pulit.