Ioh kurup ki pulit haduh 170 litar ka kyiad na ka jingkhynra ha ka nongbah Shillong

Syllad | The Rising MeghalayaSeptember 7, 2024

Ki pulit ka East Khasi Hills ha ka 6 tarik Nailur ki la pynlong ka jingkhynra kyiad bad kiwei ki jait jingdih ba beain ha ki bynta bapher bapher jong ka Nongbah Shillong ha kaba ki la ioh ban kurup haduh 170 litar ka kyiad beain.

Ia kane ka jingkhynra kyiad bad jingdih beain la pynlong ha ki bynta jong ka thain Sadar, Khyndailad, thain Polo bad ha ki thain Mawblei bad Madanrting.

U Superintendent of Police ka East Khasi Hills, u Bah Sylvester Nongtnger u pyntip ba ha kane ka jingkhynra ki pulit ki la ioh ban kurup haduh 70 litar ka kyiad phareng bad 100 litar ka kyiad pyrsi. Halor kane la sdang ruh ban pynlong ia ka jingtohkit pyrshah ia ki briew kiba donkti.

Nalor kata u la ong ba ki pulit ki la shim ruh ia ki sienjam kiba tyngeh pyrshah ia ki nongkam bymman ban khmih na ka bynta ka jingshngain jong ki riew paidbah ha ka leit ka wan ha ki lynti surok.

“Ki pulit ka East Khasi Hills ki don ia ka jingkut jingmut kaba skhem na ka bynta ban bteng ban tehlakam ia ki kam khaii kyiad beain, ia ki nongniah kali kiba shoh khawiang lem bad kiwei pat ki kam beain ban pynthikna na ka bynta ka jingshngain bad ban pynneh ia ka shongsuk shongsain hapdeng ki nongshong shnong,” bynrap u heh pulit.