Ioh kurup ki pulit haduh 340 tyli ki kuli anti-aircraft bad saw ki synduk thep kuli na SGH

Syllad | The Rising MeghalayaApril 25, 2024

Ki pulit ka Jylla haka step 25 tarik Iaiong ki la ki la ioh ban kurup haduh kumba 340 tylli ki kuli jong ki tiar siat anti-aircraft lem bad sawtylli ki synduk thep kuli na kawei ka jaka khlaw ha South Garo Hills.

Ia kine ki kuli la lapdien da ki bor pulit ka Chokpot hadien ba ki la ioh ia ka jingtip kaba thikna halor ka jingdon jong ki katto katne tylli ki synduk thep kuli ia kiba la buhrieh da ki suba lehnoh ha ki bynta jong ka khlaw ha ka shnong Chibokgre kaba hap hapoh Chokpot police station, South Garo HIlls District, ong ka khubor pulit.

Na ka liang ki bor pulit hapoh ka jingialam jong u SDPO ka Chokpot ha ryngkat ka jingsynsan lang da u CI Sadar, OC Chokpot, I/C BDDS bad laingut ki dkhot ka tnat pulit mardor ki la hiar sha katei ka jaka ha ka por kumba 1.15 mynstep na ka bynta ban pynlong ka jingwad ia kitei ki kuli bad ki tiar ba la buhrieh.

Hadien ka jingwad kaba la iaid katto katne por ki pulit ki la lapdien ia kine ki kuli bad synduk kuli ba la buhrieh ha kane ka jaka ha ka por kumba 3.27 mynstep.