Ioh kurup ki pulit ia u drok heroin ba 92.42 gram na ar jaka, kem 3 ngut

Syllad | The Rising MeghalayaMarch 9, 2024

Ki dkhot ka Tnat ANTF ka Ri Bhoi District ha ryngkat ki bor pulit ka Byrnihat PS ha ka 9 tarik mynta u bnai ki la ioh ban kurup noh ia u drok heroin uba don ka jingkhia kaba haduh 92.42-gram bad kem noh ia laingut ki briew.

Na ka liang u heh pulit ka District u pyntip ba hadien ba ki la ioh ia ka jingtip kaba bniah ha kaba iadei bad uwei u nongkhaii drok uba la tip kyrteng kum u Kaisikamo uba shimti ia ka song ba la thep ia une u jingdih ba beain na Dimapur, kumta ki bor pulit ki la pynlong ka jingkhynra hapoh ka iingsah jong u bad ioh kurup phra tylli ki synduk sabon, bad hadien ba la test ia ki la lap ba u dei u heroin uba don haduh 92.2 gram.

Hadien kane ki dkhot ka tnat ANTF ha ryngkat ki pulit ka Rynjah PS ki la pynlong ka jingkhynra ha ka nongbah Shillong bad ioh kem noh ia uwei pat u briew uba la tip kyrteng kum u Tilak Rai uba thmu ban shimti ia kane ka song drok kumjuh ia kawei pat ka nongbei tyngka kaba kyrteng ka R Gracy Hraveinai.

Na kine ki arngut la ioh ban kurup noh ia ka pisa T.1,04,000 kynthup ia laitylli ki mobile phone.

Ki pulit ki pyntip ruh ba u Kaisikamo u dei na ka jylla Nagaland bad u Tilak Rai 32 snem rta u dei napoh Nongmensong, Shillong, katba ka R. Gracy Hraveinai 36 snem rta ka dei na ka Jylla Manipur.