Ïoh kurup ki pulit ïaki battery ba shah tuh na ki tower phone & ïohkem 6 ngut ki snar nongtuh
JOWAI: Ki Pulit jong ka West Jaiñtia Hills District kila ioh kurup biang ïaki battery ba shah tuh kiba pyndonkam ha ki tower mobile phone bad kila iohkem ruh 6 ngut ki suba snar nongtuh.
Ki Pulit kila iathuh ba haka sngi Balang haka por 6 baje mynstep hadien ka jingioh khubor kaba thikna, kila leit ban khynra ïa kawei ka jaka sah ki bar jylla kiba die nar jot tin jot kaba don ha Ladthadlaboh, Jowai hajan ka kudam ka Rymbai Gas Agency.
Ki pulit haka jingkhynra ia katei ka ïing ba sah ki bar jylla kila ioh kurup ym duna ïaki 40 tylli ki battery tower mobile na khrum jingthiah jong ki. Nalor ki battery la kurup ia kiwei kiwei ki tiar jong kiba battery kiba la dep ban pynpait pynpra bad song ha ki byrni, ki kurat ot nar bad kawei ka kali gypsy jot kaba pyndonkam da kitei ki bar jylla, kaba la pyndait da ka registration number thok.
Kine ki battery dei kiba la shah tuh na Tuber, Thadmuthlong, Jowai bad Hynniawmer bad kiwei kiwei ki jaka.
La iathuh ba ha kane ka jingkhynra ia katei ka iing ki don katto katne ki suba donkit kila lait phet.
Halor kane ka jingiohkurup ia kine ki battery ka jingtohkit ki pulit kala iaid shakhmat bad dang thwet ruh ia kiwei kiwei ki suba ban pynpra iaka kynhun jong kine ki nongtuh.
Facebook
Instagram
Youtube
Twitter
Leave a Reply