Ioh kurup ki pulit ka haduh 47 kilo u kynja na Umtyra

Syllad | The Rising MeghalayaAugust 1, 2023

Ki pulit ka Khliehriat, East Jaintia Hills District ki la ioh ban kurup haduh 47.157 kilo u kynja na kawei ka kali Alto kaba don ia u  B/R No AS23 J 0171 kaba wan na Tripura da ka jingthmu ban wan sha Shillong ha kaba la kem noh ruh ia arngut ki suba donkti.

Na ka liang ki pulit ki la ong ba ha ka miet jong ka 31.07.2023, hadien ba la ioh ia ka jingtip kaba thikna halor ka jingdon jong ki arngut ki nongkhaii drok kiba la wan da katei ka kali Alto na ka jylla Tripura da ka jingthmu ban wan rung sha ka nongbah Shillong, kumta ruh na ka liang ka tnat pulit ka la pynap ka jingap shrip ka shnong Umtya bad ioh ban bat noh ia kane ka kali.

Hadien kane ki pulit ki la kem noh ia ki arngut ki suba donkti na kane ka kali bad pynlong ka jingtalasi ia kane ka kali ha ka jingiadon lang ki sakhi ba laitluid hadien ba la lap haduh 37 tylli ki song ba la kyllain da ka brown tape. Hadien ba la leh ia ka tes la shem ba u dei u kynja uba don ka jingkhia kaba haduh  47.157 kilo.

Ia kine ki arngut ki suba la tip kyrteng kum u Shir Debbarma 37 bad u Pradip Debbarma 32 snem rta kiba dei na ka thain West Tripura District. Nalor ka kali ba la kurup, na kine ki arngut la ioh ruh ban kurup noh ia artylli ki mobile phone bad ka pisa T.10530.

Halor kane ka jingjia la rejistar case hapoh ki kyndon jong ka NDPS hapoh Khliehriat PS bad ka jingtohkit ka dang iai shakhmat ban lapdien shuh shuh ia kiba donkti ha kane ka kam khaii beain.