Ioh kurup ki pulit palat 34-gram u drok heroin na ka thain Umkiang, shah kem arngut

Syllad | The Rising MeghalayaFebruary 27, 2024

Ki pulit ka East Jaintia Hills ha ka 26 tarik mynta u bnai ki la ioh ban kurup haduh 34.44-gram u drok heroin na kawei ka kali Tata truck 1512 B/R No. AS 28 AC 1046 kaba wan na Kalain, Cachar Assam da ka jingthmu ban leit sha ka thain Lumshnong bad kem noh ia arngut ki briew kiba donkti.

Na ka liang u SP ka East Jiantia Hills, u Giri Prassad M, IPS u pyntip ba kane ka jingioh kurup ka la wan long hadien ba ki bor pulit ki la pynjur ia ka jingpahara shwa ka jingpynlong ia ka ilekshon ha ka jylla da kaba pynlong ka jingtalasi ia ki kali ha ki bynta jong ka thain Umkiang.

U la ong ruh ba ki pulit ha ka por kumba 10 baje mynmiet  ki la pynieng bad talasi ia katei ka trok bad ioh kurup ia artylli ki synduk sabon na ki arngut ki briew kiba la tip kyrteng kum u Dony Paya Mulieh 19 snem rta uba dei na ka shnong Khliehshnong Lumshnong,  bad u Langki Rymbai 23 snem rta uba dei na ka Dongdukan Lumshnong, PS- Lumshnong, EJH.

Hadien ba la pynlong ka jingtest ia kine ki song ba la ioh kurup ha ryngkat ka jingdon lang ki sakhi ba laitluid ha kaba la shem ba u dei u drok heroin uba don haduh 34.44 gram.

 Na ka liang ki bor pulit ki la kurup noh ia une u drok kumjuh ia artylli ki mobile phone bad la registar case pyrshah ia kine ki suba donkti hapoh  Lumshnong PS Case/ No. 07(02)24 u/s 21 (b)/ 29 NDPS Act.  Ka jingtohkit pyrshah ia kine ki arngut ka la iaid shakhmat.