Ioh kyrdan PhD ka Alacrity Muksor na ka IIT Guwahati

Syllad | The Rising MeghalayaJuly 15, 2024

Ka Alacrity Muksor kala ioh pdiang iaka kyrdan Doctorate of Philosophy na ka jaka pule ba pawkhmat jong ka Indian Institute of Technology Guwahati ha ka Convocation kaba 26 kaba la long ha ka 14 tarik mynta u bnai.

Ka Samla Alacrity Muksor kaba dei na ka shnong Ummulong, West Jaintia Hills District, ka dei ka khun jong I Kong Emmonlang Muksor bad u Bah Iohbor Dhar.

Ka jingiaid lynti jong ka Alacrity ha ka liang ka jingpule ka dei kaba la sakhi ia ka jingtrei shitom, ka jingtbit, jingshemphang bad ka jingkut jingmut ban rah ia ki mat kiba iadei bad ki jingeh ha ka liang ka koit ka khiah bad ka imlang sahlang lyngba ki jingwad bniah.

Ka Alacrity kaba la pyndep ia ka Master ha ka ‘Public Health’ ka don ia ka tynrai kaba khlain halor ki jingjop kiba bud jong ka.

Ha u snem 2017, ka la lah ban kyntiew ia lade da kaba pyndep ia ka National Eligibility Test bad Junior Research Fellowship ha ka Social Medicine bad Community Health, kaba pyni halor ka jingtbit jong ka ha ki kam wad bniah ha ka liang ka koit ka khiah kaba iadei bad ki paidbah.

Ha u snem 2019, ka Alacrity ka la sdang ia ka jingpule na ka bynta ka kyrdan Doctor ha ka Development Studies ha ka Department of Humanities and Social Sciences, Indian Institute of Technology Guwahati. Hapoh ka jingbtin lynti jong ka Dr. Daksha Parmar, ka la pynlong ka jingpule bad wad bniah lyngba ka jingthoh ne thesis kaba la ai kyrteng “Experiences of Women with Diabetes: A Study in West Jaintia Hills District, Meghalaya.”

Ka thesis jong ka jingwad bniah ka long halor ki jingeh jong ki kynthei kiba don ia ka jingpang shini kaba ki iakynduh ha ka jinglong jong ki jaka bad ka kolshor, kaba aijingmut ia ki jingshemphang kiba kordor ha ka liang ka koit ka khiah bad ka imlang ka sahlang.

Ha ka 6 tarik Rymphang 2024, ka Alacrity ka la jop ha ka ban iada ia la ka jingthoh jong ka, da kaba pynpaw ia ka jingshemphang ba jylliew jong ka ha ka liang ka jingstad bad ka jingsngewthuh ia ka phang wad bniah jong ka.Ka jingpule bniah jong ka ym tang ia ka jingiakren ha ka liang ka jingpule hynrei ka pynskhem ruh ia ki jingktah kiba lah ban mih na ka bynta ka jingthaw ia ki policy bad ki lad jingiarap ha ka liang ka koit ka khiah kiba thmu ban kyntiew bad pynbha ia ka jingim jong ki kynthei kiba kit ha ryngkat ki jingpang kiba shem shitom ban pynkoit.

Ka jingiaid lynti ha ki jingpule ki jong ka ki pynpaw ia ka tynrai jong ka bad ka jingaiti na ka bynta ban wanrah ia ka jingkylla ha ka imlang ka sahlang jong ka bad shabar lyngba ki jingwad bniah ki jong ka.