Ïoh mar rashon ba duna kilo bad kiba pyut ki paidbah ha Jaiñtia Hills

Syllad | The Rising MeghalayaFebruary 23, 2020

Ki paidbah kiba shaniah mar bam rashon kila ïakynduh jingeh bha namar ba kim ïoh satia ïaki mar mata kiba biang kilo naduh u khaw, shini, umphniang, pyiat bad kiwei kiwei ki mar ha kylleng ki shnong la sor ne nongkyndong ha Rilum Jaiñtia.

Ka Synjuk Ki Waheh Shnong Ri Jaiñtia kala ïathir sani bha halor ka jingeh kaba ïakynduh ki paidbah haka jingïalang kaba long ha sngi Saitjain ha Ladthadlaboh. Ïa kane ka jingialang la pynïaid da u Army Lypon president ka synjuk haka jingïadonlang ki waheh shnong bapher bapher na East bad West Jaiñtia Hills District.

La ïathuh ba ki paidbah nongshong shnong mynta kiba shaniah mar bam rashon ki ïakynduh jingeh namar ba ki dukan die rashon ki pynduna ïaka haka jingthew kilo jong ki mar bam mar dih nalor ba ki ai da ki mar pyut kum u pyiat dang shen la sam sha u paidbah da uba la mih sla bad uba pyut.

Halor ka synjuk kala rai ban ai jingthoh sha u Deputy Commissioner (supply) ban leh ïaka donkam ban kyrpad ban bthah ïaki dukan rashon ban die iaki mar ba biang kilo bad ban ym dei satia ban ai ïaki mar ba pyut ne sniew sha u paidbah.

Ka synjuk ka kyntu ïaki paidbah ruh ba kim dei satia ban pdiang ïaki mar ba sniew ne pyut bad dei ban pyntip sha ka tnad supply lane sha ki nongialam shnong bad ka synjuk.