Ioh mihkhmat sawngut ki nongjngi na ka jylla Meghalaya sha ka National Games ka ban long ha Goa

Syllad | The Rising MeghalayaOctober 8, 2023

Saw ngut ki nongjngi na ka jylla Meghalaya kaba kynthup ia arngut ki kynthei bad arngut ki shynrang ki la ioh ia a kabu ksiar ban leit mihkhmat ia ka jylla sha ka National Games kaba 37 kaban long ha Goa.

Kine ki saw ngut ki nongjngi ki ban leit mihkhmat ia ka jylla kiba dei napoh ka shnong Shella ki kynthup ia ka  Ilarisuk Youroi, u Mebankitboklang Banai, Banpynshngain Syngwan bad ka Pdiangsuklang Syngwan.

Ia kane la iathuh da u Secretary ka Meghalaya Swimming Association u Bah Ian Lyngdoh haba iakren bad ki kato katne ki nongthoh khubor ha Crinoline Swimming Pool haka Saitjain kaba dei artad ka sngi ha kaba na ka liang ka MSA ka la pynlong ia ka lympung iakob jngi ba la tip kum ka “16th State Aquatic Championship.”

Na ka liang u Bah Ian u la pynpaw ruh ba u Banpynshngain lei lei dang shen u la long uwei na ki nongjngi ba kynsai bha ha ka jylla hadien ba u la rah ia ka nam kum u nongjngi ba sted tam ne u fastest swimmer ha ka jingiakob kaba la long dang shen sha Sikkim.

Kine ki saw ngut ki khynnah ka jylla kin khreh ban mih madan ban aireng ha ka iakob jngi jong ka 50M freestyle, breaststroke, butterfly bad backstroke.

Shuh shuh kumba ka long mynta u Bah Ian u pyntip ba kine baroh saw ngut ki khynnah ki don por  satang kumba 20 sngi ba kin pynkhreh janai bha ialade ban iakhun ha  ka National Games, pynban kumba ka long ka jingpynthut ka la mih paw ia ki namar ba kin don pat ki eksam ba kin hap ba kin ialeh, ha kaba marsein dep ka eksam, u bah Ian u la ong ba ka MSA kan khreh ha kaba iadei bad ka jingai jinghikai na ka bynta jong ki.