Ioh mihkhmat u Emboklang iaka India haka U-16 AFC Championship

Syllad | The Rising MeghalayaJune 20, 2020

U soh bathiang ka U-12 Chief Minister Youth Development Scheme Football ba la pyntreikam da ka sokar jylla, katba nang mih ki sngi, ki la sdang ba kin wan ban kin mihpaw, da ka jingshah jied kiba bun ki khynnah ialehkai ba kynsai ka jylla ba kin ioh ba kin phong ia ka jersey jong ka ri India.

Uwei na kum une u soh dei u  Emboklang Nongkhlaw, 15 snem ka rta ba shong ba sah ha Sohryngkham Neng, u khun jong u bah Successsly Lytan bad kong Ibelda Nongkhlaw, shen un sa khreh ban mih na la iing kum shi bynta ba un leit ban iadon bynta bad ka kynhun ki khynnah ialehkai U-16 Football ka India kaban iashim bynta ha ka lympung ialehkai jong ka AFC U- 16 Championship  kaban long ha Bahrain, ha u Naiwieng mynta ka snem.

Kumba ka long ia mynta, u Emboklang bad kiwei pat ki player jong kane ka kynhun ialehkai jong ka ri, kin dang pynkhreh naka bynta ba kin ia lum lang hapoh ha Fartoda, Goa, kum shi bynta ka jingpynkhreh ka kynhun ialehkai ka ri kaban aireng sha kane ka lympung.

Kumban shu pynkynmmaw ba ha kane ka taiew kaba mynta, na ka liang ki bor ba dei khmih jong ka AFC, ki la wan shakhmat ban pynbna ia ka jingpyniakap, ia ki ri kiban aireng ha kane ka lympung, kaba ha kane ka kynti kaba mynta, ka India la pyniakap ia ka ha ka Gr-C bad ki ri kiba don ha kane ka group ka kynthup ia ka Korea Republic, Australia bad Uzbekistan.

Ia ka sap ialehkai ba nylla u Emboklang ka la mih paw, ha ka por ba u la leit ban iashim bynta sha ka lympung ialehkai  ba pynlong da ka tnat Directorate of Sports & Youth Affairs ka sorkar jylla ka  U-12 Chief Minister Youth Development Football ba la long hapoh ka shnong Mawryngkneng ha u snem 2015, ha une u juh hi u snem, u bah Bobby L. Nongbet kum u coach ka Youth Development Cell ka Royal Wahingdoh FC, u la ibit naka bynta ban pynrung ia u Emboklang sha ka kynhun ialehkai jong kane ka klob, hadien kane, u Emboklang u la bteng ban phrang ia la ka jingim ialehkai da kaba u la shah jied naka bynta ban mihkhmat ia ka jylla ha ka lympung ialehkai jong ka Sub Junior National Football Championship, kaba la long hapoh Assam hapoh ka jingialam u bah Bobby bad hadien kane, ha u snem 2016, u la ioh ban mihkhmat biang sa shisien ia ka jylla ha ka jingleit ban iakhun sha nongbah Delhi bad ia ka kynhun la ialam ia ka da u bah Jeffrey Warlarpih bad ha u snem 2017 u la mihkhmat biang ia ka jylla hapoh ka jingialam ka jong u Bobby.L. Nongbet.

Ha u snem 2017, u Emboklang u la ioh ia ka lad ban pyniasnoh pat ialade bad ka kynhun ialehkai ka Northeast United FC hapoh ka jingialam ka jong u Playerson Syiemlieh da kaba iashim bynta ha ka lympung ialehkai jong ka U-15 Youth League.

Ha u snem 2018, u Emboklang sa shisien u la ioh ban mihkhmat biang ia ka jylla ban leit ban ialehkai shapoh Mizoram, ha u snem u ba bud katta ha u snem 2019, u Emboklang u la ioh ban mihkhmat  ia ka kynhun ialehkai ka Shillong Lajong FC, ha ka lympung ialehkai jong ka U-15 Youth League kaba la long ha Kolkata hapoh ka jingialam ka jong u Bobby.L. Nongbet.

Hynrei shwa ba u Emboklang un mihkhmat ia ka Shillong Lajong FC, u la dep ban shah jied lypa ba un don hapoh ka shlem ai jinghikai ka Tata Trust Centre for Excellence, kaba don ha Mizoram, ha kaba ka jingshah jied ka jong ban don ha kane ka shlem ka wan lyngba ka jingleit iashim bynta sha ka jingpyrshang ka ba la phah ne pyntip sha u da u CEO ba mynshwa ka Meghalaya Football Association u bah Arki Nongrum.

Dei ha ka por ba u Emboklang u la mih madan ha ka lympung ialehkai ka U-15 League ba long ha Mizoram, ba ki bor nongjied player jong ka AIFF, ki la shan ki khmat ki jong ki sha une u khynnah bad beit beit u Bibiano Fernandez, u la phah wan ia u sha ka jingpyrshang naka bynta ban ioh shna ia ka kynhun ialehkai U-16 jong ka ri tad haduh ba un da shah jied syndon ban don bad kane ka kynhun ialehkai ka ri kaban khreh ban aireng sha ka AFC Championship.

Sa kawei ka lympung ialehkai kaba u Emboklang u la ioh ban iashim bynta ka dei ka Subroto Mukherjee Cup, ha kaba u la mihkhmat ia ka skul H. Elias Higher Secondary School.