Ioh mihkhmat u khynnah na Rilum Jaintia iaka India sha ka U-16 AFC Championship

Syllad | The Rising MeghalayaSeptember 3, 2020

Ka jingtreishitom bad ka jingminot ban kilan wat hadpeng ba um shym la ialehkai bad kino kino ki klob ba pawnam ka Jylla, pynban ula mih paw uwei u khynnah uba don sap kaba nylla un ioh phong iaka jersey jong ka Ri India ban ialehkai haka lympung jong ka AFC U- 16 Championship  kaban long ha Bahrain, ha u Naiwieng mynta ka snem.

Une u khynnah u dei u Halen Nongtdu uba na ka shnong Byndihati, East Jaintia Hills District. U dei u khun jong u ma Kynsai Dkhar bad ka Kong Thilda Nongtdu kiba dei na longiing jong u ma Hambertus Nongtdu CEM barim jong ka JHADC, uba pynshlur bha ia une u khynnah ban ialehkai.

U Halen bad kiwei pat ki player jong kane ka kynhun ialehkai jong ka ri kin ia lum lang hapoh ha Fartoda, Goa, kum shi bynta ka jingpynkhreh ka kynhun ialehkai ka ri kaban aireng sha kane ka lympung.

U Halen dei tang ma u marwei na rilum Jaintia ban ioh ha kaban iadon bynta bad ka kynhun ialehkai jong ka ri haka lympung ialehkai AFC U-16 Championship 2020 ka ban long ha Bahrain haka 26 tarik Naiwieng pyrshah iaka ri Australia.

Uwei pat u ba shah jied ban mihkhmat iaka ri u dei na East Khasi Hills, Emboklang Nongkhlaw, 15 snem ka rta ba shong ba sah ha Sohryngkham Neng bad uwei pat na Ri Bhoi.

Ioh mihkhmat u Emboklang iaka India haka U-16 AFC Championship

Ha kane ka kynti kaba mynta, ka India la pyniakap ia ka ha ka Gr-C bad ki ri kiba don ha kane ka group ka kynthup ia ka Korea Republic, Australia bad Uzbekistan.

Haba iohlad ban iakren bad u Halen Nongtdu ula pynsngew shaphang ka jingiaid lynti kaba naduh ba u dang rit rta u long u khynnah uba sngewtynnad iaka jingialehkai football.

“Naduh 6 snem rta nga la ialehkai bad ki para khynnah kumjuh kiba la samla bad haka rta kaba 12 haduh 13 snem bad nga ju iashim bynta tang haki lympung ba pynlong ha shnong bad haki skul.

Kiba ha iing naduh ki kmie ki kpa bad u mama (Hambertus Nongtdu) ki kwah ba ngan leit pyntbit ialade bad ki ai ki ai mynsiem bad kyrshan bha ia nga. Da ka jingkyrshan ki kmie ki kpa ngla wad jingtip iaki jaka pyntbit kiba don shabar jong ka Jylla kum ha Kolkata, Pune, Punjab bad sha kiwei ki Jylla jong ka ri ban pyntbit shuh shuh ialade haka kam ialehkai phutbol,” la ong u Halen.

“Nga la kut jingmut halade ba shisien ba nga la leit ban pyntbit ngan ym kynran dien shuh bad nga la buh ruh iaka thong ba ngan long u player jong ka ri India bad nga la kular ia i Mei i Pa ba ha kawei ka sngi ngan ioh beit ban phong iaka Jersey jong ka ri India bad kala urlong shisha,” ong u Halen.

U Halen ula ong ba haka jingwad jingtip lyngba ka online, artylli ki shlem ne ki jaka pyntbit kawei kadei ka DSK Shivajan Football Academy kaba don ha Pune bad kawei kadei ka Minerva Football Academy kaba don ha Punjab bad ula jied ban pyntbit ialade haka DSK Shivajan Football Academy hadien ba ula pyndep iaka jingpyrshang (trial) kaba 3 sngi bad ula shah jied haka 1 tarik Nailar 2018.

“Ka jingjied jong nga iaka DSK Shivajan Academy Football ka long namar ba kadei ka jaka pyntbit kaba la biang lut bad ka don lut nadong shadong ha ki kam ialehkai”, ong shuh shuh u Halen.

Ula iathuh ba ha DSK Shivajan Football Academy ki don kumba 3800 ngut ki khynnah haki 3 tylli ki group ba kynthup iaka Group 1 jong ka kyrdan U-18, Group 2 U-15 bad Group 3 U-13.

Haka por ba u dang rung thymmai u Halen u don haka Group 3 jong ka kyrdan U-13 nangta ula kiew sha ka Group 2 bad hadien ka jinglah ban ialehkai bha ula kiew shaka Group 3 jong ka kyrdan U-18 bad ula ioh ban iashim bynta haka lympung ialehkai kaba tip kum ka Pune District Football Association U-18 Super Division.

U Halen ula pyndep ruh iaka jingpyrshang kaba 3 sngi ba la khot pynlong da ka All India Football Federation ha Pune bad haka por ba u don haka trial ki nongpyniaid jong ka AIFF ki la khot ia u sha ka jingpyrshang (trial) U-15 ha Goa bad hangne ruh ula ai ka jingpyrshang kaba ar taiew bad mar sien pyndep ia katei ka trial ula shah jied shi syndon ban don bynta bad ka kynhun ialehkai U-16 jong ka ri.