Ïoh nam jop ki nongshet jingbam tynrai na Mukhap

Syllad | The Rising MeghalayaDecember 18, 2020

Hadien bala pynlong ïaka jingïakop shet bam tynrai ha ki saw tylli ki shnong kiba don hapoh ka ka black Amlarem, Thadlaskeñ bad Laskeñ block jong ka West Jañtia Hills, ka Society for Urban & Rural Empowerment (SURE) kala pynlong ïaka jingïakop shet kaba ki nongjop na kitei ki shnong ki wan ban ïaknieh ïa ka nam jop.

Ka jingïakop shet jingbam tynrai ka dei ka kam kaba ka SURE ka ïatreilang ryngkat bad ka North East Slow Food and Agro biodiversity Society (NESFAS) kaba long ruh shibynta ka Project “No One Shall be Left Behind Initiative” ïa kaba la kyrshan da ka Rural Electrification Commission. Ia kane jingïakop kaba la pynlong haka 17 Nohprah ha ophis treikam ka SURE, Jowai bad la wan ban shim bynta da nongjop na ki jingïakop kiba la pynlong ha ki saw shnong ka Pynthor, Mukhap, Cham Cham bad Khonglah.

Ha kane ka jingïakop ki nongshet jingbam tynrai kila wan shisha da kaba la pynkhreh bha ïa ka jingbam jong ki bad kawei kawei ka jingbam kala don da ki phew jait ki jait jingbam kaba kynthup ïaka ja, ki jait jhur im bad ki kymbad (salad), ki kynja jingdih, ki jingbam tyllait (chutney) bad ki jingbam khleh, ki jyntah bala shet da kijhur tynrai bad kiwei kiwei.

Haba kren haka jingïalang kum u shahkhot kongsan, u ma LD Lakiang Waheh Chnong ka Dorbar Shnong Ladthadlaboh uba long ruh u Secretary jong ka Synjuk ki Waheh Chnong ka shnong Jowai, ula ïaroh ïa ka jingbun jait jong ki jingbam bad kumjuh ruh ka jingbang jong ka jingbam kaba la wan pyninam da ki nongshet.

Ka kong Pasqualina kaba long kum ka Associate jong kane ka project haba kren shaphang ka jingbun jait jong ki jingbam kala ong ba kane ka pynpaw ba ki nongshet kila sngewthuh shaphang ka jingdonkam ban bam ïaki jingbam bateimet kiba ngi lah ban ïoh tang nala ki jingong ki kper ki prah. Ka kong Aitilut Kyndait kaba long kawei na kiba wan ban mad ïa kane ka jingbam kala ong bad ymtang ba ki jingbam ki long kiba bam, hynrei ki long itynnad ban peit bad ym artatien bad ki dei ki jingbam kiba biang ruh ki bor tei met.

Ha kane ka jingiakop ïaka nam banyngkong la ïohrah da ka kong Ieidasper Niang bad ka kong Theijheimon Niang kiba naka shnong Mukhap. Ïa ka nam ba ar la ïohrad da ka kong Lenis Lipon bad ka kong Phida Dkhar  kiba na ka shnong Pynthor Langteñ bad ïa ka kyrdan balai la ïoh da ka kong Mil Dkhar bad kong Yoona Dkhar kiba naka shnong Cham Cham, katba ka kong Cathleen Khyriem bad ka kong Enrichetta Liting naka shnong Khonglah kila ïoh ïaka consolation prize. 

Ha kane ka juh ka sngi nalor ka jingïakop shet jingbam tynrai ka SURE kala pynlong ruh ïaka jingpyndonburom Advance Christmas bad Snem Thymmai ïaki nongtrei jong ka seng bad ïa ka jingïalang la pynïaid da u Rev H.H.Mohrmen. U ma Lakiang ula ïaroh ruh ïaka SURE na ka bynta ki kam shakri paidbah jong ka bad u kular ban ai ka kti ka jingïarap ïa ka seng lada ka donkam ïa ka jingïarap jong u. Ha kane sngi ka Pasqualina Lamare kala batai shaphang ka projek “No one shall be left behind initiative, ka kong ka Aitilut Kyndait kala kren shaphang ka Prime Hub bad ka kong Dakaipaia Bareh kala kren shaphang ka Behaviour Change Management on COVID-19.