Ioh National Referee biang ka WJDSA hadien 11 snem

Syllad | The Rising MeghalayaJune 18, 2024

Ka West Jaintia District Sports Association (WJDSA) kala ioh biang sa uwei u National Referee bad kane kala wan long hadien 11 snem.

Une u referee u dei u Bulmi Phawa, uba na shnong Nonglatem, West Jaintia Hills District. U Bulmi u trei kum u nonghikai skul Lower Primary jong ka sorkar jylla.

Ha ka shithi sha u General Secretary ka Meghalaya Football Association, u Director of State Referee ka All India Football Federation (AIFF) u la pynbna ba u Bulmi Phawa ula lah ban pyndep ia baroh ki sawtylli ki bynta jong ka National Examinations (Level 5) na ka bynta u snem 2023, kata kaba kynthup ia ka Fitness, Theory, Practical, bad Viva exam.

U Bulmi ula sdang iaka kam ban pyniaid iaka football ne referee ha WJDSA naduh u snem 2013.

Bad kane ka jingpass jong u iaka kyrdan National Referee kala ai mynsiem iaka WJDSA, kawei na ki synjuk kaba pynlong bun ki lympung ialehkai football.

Na kaliang ka WJDSA kala ai khublei ia u Bulmi bad ka kyrmen ba un long u nuksa ia kiwei ba kin iakhun iaka kam National Referee ban kyntiew iaka standard ialehkai football.

Kumban shu pynkynmaw ba u National Referee ba nyngkong eh ba sei ka Rilum Jaintia dei u ma Rumanium Syngkon. Ula pass nyngkong iaka ka National Referee ha u snem 2005 bad ka Cooper test kaba khatduh eh kaba u la leit shimbynta ka dei ha u snem 2013. Haduh mynta u dang pyniaid hi iaki football kiba pynlong ka WJDSA bad kiwei kiwei.

Nalor kata WJDSA bad ha rilum Jaintia baroh kawei kala pynmih iaka referee kynthei kaba nyngkong eh bad kane ka dei ka Riiohlang Dhar kaba trei ruh iaka kum ka Pulit hapoh ka tnad pulit ka Jylla Meghalaya

Ka Riiohlang kala sdang ban pyniaid iaka football ha ki lympung ialehkai ka WJDSA ha u snem 2009-10 bad hadien pat kala kiew sha sor Shillong ban pyniaid iaki lympung ka ialehkai football ka Shillong Sports Association (SSA) bad dei ha u snem 2017 kala pass iaka kyrdan National Referee

Ka dei ruh kaba nyngkong na ki kynthei na jylla Meghalaya ban shah jied haka FIFA ha u snem 2020 ban pyniaid iaki football ha ki lympung ialehkai bar ri. Kala ioh ban pyniaid iaka rynsan I League, Indian Women’s League, AFC, SAFF bad kiwei kiwei.