Ïoh nongkitkam ba pura ka Jaiñtia Youth Federation

Syllad | The Rising MeghalayaAugust 20, 2019

JOWAI: Ka Jaiñtia Youth Federation kala ïoh ban jied ïaki nongkitkam ba pura jong ka naka bynta ka samoi trei kam 2019-21 haka sngi ba Ar ha ophis treikam jong ha Mookyrdup, Ladthadlaboh, Jowai.

Ki nongkitkam ba thymmai jong ka JYF-Central Body:
President : U O.L. Tariang
Vice-President : U J. Pala & Mr. M.S. Ryngksai
General Secretary : U N. Rymbai
Joint Secretary : U S. Pajuh
Finance Secretary : U F. Rymbai
Publicity Secretary : U L.K. Rymbai
Sports Secretary : UT. Phawa
Organising Secretary : U K. Lapasam
Asst. Organising Secretary : U S. Ryngkhai
Education Secretary : U B. Chyrmang
Environment Secretary : U D. Lyngdoh
Socio Economic Secretary : U M. Amkhloo
Art & Culture Secretary : U K. Rymbai

Shuwa ban sdang ïaka jingjied nongkitkam ba thymmai la don ka jingsngap ba jar jar kum ka dak ban kynmaw burom ia u president barim ka JYF (L) Poipynhun Majaw.

Ha kane ka jingpynskhem ïaki nongkitkam ba thymmai la iadonlang u Ma D.L. Rymbai, u ba long u President barim ka JYF, u la shim ia ka bynta ban pynban smai ia ki nongkitkam ba thymmai jong ka seng.

U Ma LD Lakiang, Founder President, u la shim ia ka bynta ban ot ia u cake ka jingdap 15 snem jong ka.

U DL Rymbai u la ai ki kyntien sneng bad u la kyntu ruh ia ki nongkitkam ba kin ialam lynti ia ka seng da kaba pyni ia ki kam kiba bha, da ka burom akor bad khamtam eh ban aiti lut ialade na ka bynta ka iap ka im ka ri bad ka jaid bynriew. U la pynkynmaw ruh kumno ha ki por ba u dang long u nongïalam ba ki trei da ka mynsiem shitrhem bad kumno ka seng ka la lah ban leh shibun ki kam na ka bynta ka ri bad ka jaid bynriew.

Kane ka la jia dei tang lyngba ka jingialam ha ka jingtip Briew tip Blei bad khamtam da ka burom ka akor. Shuh shuh u la ong ba ka kam shakri ka long kaba ngim lah ban lait na ki jingshah kdew kti ha kiba bun ki liang. Hynrei ym dei ban pynsngap ia kum kine kiei kiei bad dei ban kynmaw ia kane kawei ba ka jingshakri ia ki para briew ka dei ka jingshakri ia U Blei. U la ai mynsiem shuh shuh ia ki nongkitkam ba thymmai da kaba pynkynmaw ba lada ki leh ia ki kam babha katno katno ruh wat khmih lynti ba ki briew kin iohi ne peit hynrei lada ki leh bakla tang iwei iba rit tam ki briew kin iohi bad pynheh ia kata ka jingbakla bad u ong ym dei ban sngew eiei ia kum kita namar kane ka dei ka jingduna jong ngi ki briew. Ha kaba khadduh u la ong ba u long uba la kloi ba iadonlang bad ka JYF ha kino kino ki por ba ka seng ka donkam ia u kum u nongaibuit aibor.

Na ka liang u Ma L.D. Lakiang (Founder President) u la batai lyngkot ia ka history jong ka Seng bad u la batai bniah ruh ia ka nongrim ba la seng ia ka JYF. U la ai ki kyntien sneng kyntien kyntu kynpham bad u la kyrkhu kyrdoh ruh ia ki nongkitkam ba thymmai. “Ngi hap ban mat shibun ki jingeh bad ki dieng pynkiang ha ki jingialeh, hynrei ngim dei ban duh jingkyrmen bad dei ban poi shaka ka thong da kaba tur ia ki rai eh rai dam kiba pynwit ha ka lynti na ka bynta ka bha ka miat ka imlang ka sahlang,” ula ong ma Lakiang bad ula pynpaw ba u long uba la kloi ban iadonlang bad ka Seng ha kino kino ki por ba ka Seng ka sngew donkam ia ka jingiarap jong u kum u kpa.

Khadduh la ioh ruh ia ka jingkren na u President ba thymmai u O.L. Tariang uba la khot u wer ia ka jingiatreilang baroh ki nongkitkam bad ki dkhot jong ka JYF. “Ngin ieng tylli lang baroh tang kum kawei, ym don ki bor ba lah ban pynthame bad pynkhyllem ia ngi hynrei lada ngi saphred ngin ym lah ban ieng pyrshah wat tang ia iwei iba rit tam,” la ong U OL Tariang bad ha kajuh ka por u khot ia ka jingiatreilang ruh baroh ki dkhot ba rim jong ka seng la ki don ha kano kano ka jaka bad ka jingtrei, ba kin sngewbha ban don ryngkat bad ka Seng.

Ha kane ka sngi la lah ban iadon ryngkat ruh ki nongialam jong ka Jaintia Student Union (JSU -CB) naduh General Secretary u J. Shylla, Publicity Secretary T. Mukhim bad kiwei kiwei ki nongialam bad dkhot barim ka JYF.