Ioh nongkitkam Seng ki khynnah skul barim ka St.Paul Marbisu; wer sha ‘Annual Meet’

Syllad | The Rising MeghalayaOctober 17, 2023

Ka Past Pupils’ Association St. Paul’s Higher Secondary School Marbisu, ha ka jingialang ki para khynnah skul barim ka ba la long ha ka 7 tarik Nailur 2023 ha hall jong ka skul St. Paul’s Higher Secondary School Marbisu ka la ioh ban jied noh ia ki nongkitkam bathymmai (Adhoc body) jong ka ha kaba u Bah Kestar Warjri u la  shah jied kum U President bad u Bah  Wan Damme Chwa Sumer kum  U General Secretary.

Kiwei pat kiba la shah jied ki kynthup ia u Bah Donborlang Kurbah Vice President,  Kong Balbiangty Thabah Asst. Secretary, Bah Charles Khyriem Finance Secretary,   Roland Lyngdoh  Asst. Finance, Edmund Kurbah   Social Secretary,  Khlain Synshar Sun Organizing Secretary, Bah Albert Kurbah Asst. Organizing Secretary,  Wealthy Born Field Sun  Publicity Secretary bad u Bah Glamour Malngiang kum U Asst. Publicity Secretary, kata nalor ki Executive Member.

Ha kane ka jingialang la ia rai lang ban pynlong ia ka ‘ANNUAL MEET 2023’ ha ka 24 tarik mynta u bnai   ha hall jong ka Skul ha ka por 11 baje mynstep ha kaba U Bah Mathew Beyondstar Kurbah M.L.A ka Mawphlang Constituency, U Bah Lamphrang Blah MDC ka Mawphlang Diengiei Constituency bad U Bah Sherbor L. Mawlong MDC Nongspung Sohiong Constituency, kiba dei ruh kiwei na ki khynnah skul barim jong kane ka skul kin sa don ryngkat kyrpang ha kane ka jingialang.

Kumta U President ka Association u la kyrpad jur ia baroh ki khynnah skul barim jong kane ka skul ba kin sngewbha ban kyrshan bad ban iapoi khnang ha katei ka jingialang ka ban wan.

U president ha ka jingkren u la pynpaw ruh ba ka lah dei ka por ba kane ka Skul kan pynmih shuh shuh sa da kiwei pat ki shnat pule bad lyngba ki khynnah skul barim kiba lah ioh bad nang ban thoh ia u dak pule na kane ka skul kin sa noh synniang shuh shuh halor kine ki kam kum ka jingai sngewbha ha ka jingim.

Shuh shuh u la ai jingmut ruh ia ki khynnah skul barim kiba lah ban iatreilang da ki Batch Wise System kan long ka jingmyntoi bad pynkhlain shibun ia ka kynhun. U la ong ruh ba kane ka kynhun ka dei ban don ka jingiakynduh man u snem khnang ba kan im ka kynhun bad ban long pat ka jingmyntoi ia ki longdien ki ban wan. U lah pynkynmaw ruh ba kane ka Association ka kynthup lang ruh ia baroh ki khynnah kiba pule ha ka Primary bad English Section kumjuh.