Ioh nongkitkam thymmai ka FKJGP East Jaintia Hills

Syllad | The Rising MeghalayaNovember 18, 2023

Ki nongïalam ka Federation of Khasi Jaintia & Garo People (FKJGP) sengkmie haka 17 tarik Naiwieng ki la hiar sha nongbah Khliehriat ban pynskhem bad pyntian smai ïaki nongialam bathymmai jong ka Federation of Khasi Jaintia & Garo People (FKJGP) East Jaintia Hills District na bynta ka samoi treikam jong u snem 2023-2026.

Ïaki nongkitkam la pynskhem bad pyntian smai da u president rangbah u Dondee Cliff Khongsit haka jingïalang kaba la pynïaid da u Damian War President FKJGP West Jaintia Hills District ha Community Hall Khliehriat West.

Hashwa ka jingpynskhem iaki nongkitkam bathymmai, u Dondee Cliff Khongsit haka jingkren ula ong, iaka FKJGP la seng haka 4 tarik Naiwieng 1989 bad mynta u snem ka la kynjoh iaka lynti iaid kaba 34 snem.

Ula iathuh ruh iaka nongrim jong ka FKJGP ba ka ieng halor ki lai tylli ki maw byrsiew ki ban kyrshan bad kyntiew iaka ri bad ka jaitbynriew kita ki long kumno ban wanrah iaka jingkylla haka imlang sahlang, haka roi ka par bad kumjuh ruh haka synshar khadar.

Ka FKJGP kan ym kular ia phi iaka jingsuk, hynrei kynmaw ka Along bad Police station ki la ap lypa ia phi ha kano kano ka por namar ka sorkar ka don tang kawei ka buit kata ban pyntieng pynsmiej iaki dkhot da kaba thep along hapoh ki iing byndi ki jong ka, la ong Khongsit.

U Vice President FKJGP sengkmie u Kitbok Mawphlang ula kyntu iaki nongialam bathymmai ba kimdei ban long kiba kyrkieh haba shim ia kino kino ki mat ki jura ne issue namar ka jingkyrkieh ka lah ban wanrah ka jingktah pat iaka jaitbynriew hadien. U khmih lynti ba ki nongkitkam kiba thymmai kin lah ban treikam khambha na bynta ka jingdonkam jong ka ri bad jaitbynriew.

La ioh ruh ka jingkren kyntu kynpham na u General Secretary KSU East Jaintia Hills District Unit u KS. Suchiang, u President FKJGP Jaintia Hills Zone u Tuesday Lytep, haka jingdonlang da ki dkhot na ki kynhun sengbhalang bapher bapher ryngkat ki katto katne ngut ki waheh Shnong.

Ki nongkitkam bathymmai jong ka Federation of Khasi Jaintia & Garo People East Jaintia Hills District ki long u Deihok Sumer kum u President, Welking Swer Vice president, Emlang Sutnga General Secretary, Hamkhia Siangshai Assistant General Secretary, Andiwor Pala Organizing Secretary, Johnlang Bamon Assistant Organizing Secretary, Michal Chyrmang Information Secretary, Edwan Dkhar Assistant Information Secretary, Mathew Pajat Sports Secretary, Ying Siangshai Assistant Sports Secretary, Prosperity Rymbai Education Education Secretary, Eladmi Suchen Assistant Education Secretary, Op Nongtdu Disciplinary Secretary, Lamchwa Dong Assistant Disciplinary Secretary, Fullmoon Nongtdu Agriculture Secretary, Omega Sumer Assistant Agriculture Secretary, Alprins Dkhar Chief Adviser bad Cyprian Dkhar Legal Adviser.