Ioh ophis treikam ka Namdong-B

Syllad | The Rising MeghalayaApril 27, 2021

Ban pynsuk ïaki paidbah nongshong shnong bad ban pynjanai ïaka rukom treikam, ka shnong Namdong B ka la plie paidbah ïaka ophis treikam jong ka haka jingïalang kaba la long haka sngi Nyngkong.

Ïa kane ka ophis treikam la wan ban plie ïaka da u President ka Synjuk ki Waheh Shnong Mynsngat Namdong Khanduli Area u Yooshida Nongspung haka jingïadonlang u Waheh Shnong Khonsaro u Damonmi Dkhar uba long ruh u Secretary Synjuk ki Waheh Shnong Mynsngat Namdong Khanduli Area haka jingïalang kaba la pynïaid da u Waheh Shnong Namdong B u D.S.War.

U Yooshida Nongspung haka jingkren ula ong, ka Namdong B kadei ka shnong kaba nyngkong sha kane ka thaiñ ban don ïaka ophis treikam jong dorbar shnong.

Ula kitbok kitrwiang ïaki dkhot EC bathymmai ban kin nangtrei shuh shuh na ka bynta ka bha ka miat ka shnong ka thaw bad ban ïakhun pyrshah ïaki kam sniew haka imlang ka sahlang.

U Damonmi Dkhar haka jingkren ula kyntu ïa nongïalam shnong bad nongshong shnong ban don ka mynsiem ïa ïeid ïatylli para nongshong shnong khnang ba ka roi ka par bad jingkylla kin wan hapoh shnong poh thaw.

Ha kane ka sngi la donlang ruh u Elias Susngi Waheh Raij Namdong bad u Icydol Pakma Secretary Raij Namdong kiba la ïaroh ïa u Waheh shnong bad ïaka Executive committee ba ki la shim ïa kane ka sein jam ban plie ïa kane ophis treikam.