Ioh pdiang i Kong Helen Giri iaka khusnam Sangeet Natak Academy na ka President ka Ri

Syllad | The Rising MeghalayaMarch 8, 2024

Ka President jong ka Ri  ka Droupadi Murmu ka la pynkup burom da ka khusnam Sangeet Natak Akademi Awards (Akademi Puraskar) na ka bynta u snem 2022 bad 2023 sha ki 91 ngut ki barikor ba pawkhmat (ar tylli ki khusnam ba la ai lang ia ar ngut) ha ka kam performing arts ha ka prokram kaba la long ha ka 6 tarik mynta u bnai ha Vigyan Bhawan, New Delhi, ha kaba  I Kong Helen Giri na Meghalaya i la ioh pdiang ia ka khusnam Sangeet Natak Akademi na ka bynta u snem 2023 halor ka jingnoh synniang jong i sha ka put ka tem tynrai jong ka jylla Meghalaya.

La kha ha ka 7 tarik Rymphang 1944, i Kong Helen Giri I long i barikor ba tbit ha ka put ka tem tynrai na Meghalaya, bad ki paw bha namar ki sienjam ban kyntiew bad pynneh ia ki jingshad Khasi tynrai. Kum ka nongrwai tynrai ba pawnam jong ka All India Radio, i la don ka bynta kaba khraw ha ka jingwanrah ia ka put ka tem Khasi tynrai sha ki rynsan jong ka ri. Ki jingiashim bynta jong i kum ka nongrwai ha ka jylla, hapoh ri bad shabar ri ka la wanrah ka jingithuh.

I Kong Helen Giri i la iashim bynta ha ki prokram bad ki tamasa bapher bapher, hynrei i la pynlong ruh ia ki tamasa tang na ka bynta ka put ka tem bad ka jingshad tynrai ha Meghalaya, kaba ka imlang sahlang ka la pdiang bha.

Lyngba ka jingtrei shitom jong i, i la wanrah ka jingpynthymmai ha ki kam saindur bad ki kam kiba iadei bad ka deiriti khamtam ha ki dustur tynrai jong ki Khasi. Shuh shuh, i la shim ia ki sienjam ban wad ia ki nongsaindur ba la tbit bha kiba la ioh jinghikai pyntbit ha ki thup bapher bapher jong ki tiar tem.

Kane ka jingpyrshang ym tang ba ka la pynneh pynsah ia ka jingsaindur ia ki tiar hynrei ka la long ruh kum ka lad kamai kajih ha ki shnong ba i la kyrshan. Ki jingnoh synniang jong i ki la kyntiew ia ka jinglong ka deiriti jong ka jylla Meghalaya.

I Kong Helen Giri i la ioh pdiang ia ka khusnam Padma Shri na ka bynta ka jingnoh synniang jong i sha ki kam saindur bad ki kam kiba iadei bad ka deiriti jong ka Meghalaya ha u snem 2008.

Ha ryngkat ka jingai ia ka khusnam Sangeet Natak Akademi Awards, ka President ka la pynkup burom ruh ia ka khusnam Sangeet Natak Akademi Fellowship (Akademi Ratna) sha kine ki barikor harum na ka bynta ka jingnoh synniang jong ki ha ka kam performing arts ha ka jingialang sam khusnam. Ka Sangeet Natak Akademi Fellowship (Akademi Ratna) ka dei ka khusnam kaba heh tam ba la ai sha ki barikor ha ki kam performing arts.

Vinayak Khedekar, Goa , Indian Music

R. Visweswaran, Karnataka, Indian Music

SunayanaHazarilal, Maharashtra, Indiana Dance

Raja &Radha Reddy, Delhi, Indian Dance (Joint Fellowship)

Dulal Roy, Assam, Indian Theatre

D.P. Sinha, Uttar Pradesh, Indian Theatre

U Myntri ki Tnat Deiriti, Kam jngohkai bad DoNER, u G. Kishan Reddy, Myntri Khynnah ba dei khmih ia ka Tnat Law & Justice (Independent Charge) bad Parliamentary Affairs and Culture u Arjun Ram Meghwal, Secretary, Tnat Deiriti u Govind Mohan bad Chairman, Sangeet Natak Akademi Dr Sandhya Purecha ki la ia donlang ha kane ka jingialang sam khusnam.

Ka Akademi Awards ka dei kaba la sdang naduh u snem 1952. Kine ki jingpynkup burom ym tang ba ki long ka dak jong ka kyrdan kaba heh tam ha ki jingjop bad ka dei ruh ka jingithuh jong ka jingtrei shitom bad ka jingnoh synniang.

Ka khusnam jong ka Akademi Fellow ka kynthup ia ka song tyngka kaba T. 3,00,000/- (Lai lak tyngka) katba ka Akademi Award ka kynthup ia ka song tyngka kaba T. 1,00,000/- (shi lak tyngka), nalor ka Tamrapatra and Angavastram.