Ioh pdiang ka Meghalaya artylli ki khusnam halor ka jingpynrung kyrteng Aadhaar

Syllad | The Rising MeghalayaApril 15, 2025

Ka Sorkar Meghalaya ka la ioh pdiang artylli ki khusnam na ka Unique Identification Authority of India (UIDAI) ha ka Aadhaar Samvaad 2025, kum ka Jylla kaba lah ban pyntreikam bha ban leh ia ka Mandatory Biometric Updates (MBUs) na ka bynta ki khynnah bad kum ka Jylla kaba biang tam ha ka Verification halor ka jingpynrung kyrteng Aadhaar na ka bynta kiba la san.

Ia kane ka khusnam ka Jylla ka la ioh pdiang ha katei ka jingialang kaba la long ha ka 8 tarik Iaiong hapoh Bharat Madapam Convention Centre, New Delhi.

Ka jingioh pdiang ia kine ki khusnam ka long ka jingpynshisha ia ka jingtrei shitom kaba long ruh ka nuksa jong ka Jylla ha kaba pynkhlain ia ka jingshakri kaba iadei bad u Aadhaar bad ban pynthikna ia ka jingpynrung kyrteng pura na ka bynta ki khynnah bad kiba la san ha kylleng ka jylla Meghalaya.

Ia kine ki khusnam na ka bynta ka jylla la leit ban shimti da u Bah Shai Kupar War uba dei u Nodal Officer (Aadhaar), General Administration Department ka sorkar Meghalaya.

U Commissioner & Secretary ka jylla uba dei ruh u Nodal Officer ka jylla uba khmih ha ka jingpyntreikam ia u Aadhaar u Dr Joram Beda u la pynpaw ia ka jingsngewhun bad ka jingsngewnguh halor kane ka jingjop.

“Kane ka jingjop ka pyni ia ka jingtrei shitom met bad mynsiem jong ka kynhun Aadhaar jong ngi, kata naduh ki dkhot hapoh ki shnong ki thaw haduh ki heh hapoh ki district bad ki technical staff. Nga ai khublei ia baroh kiba la noh synniang halor kane ka jingai jingshakri kaba jop,” pynpaw u Dr Joram Beda.

Ka GAD ka iengskhem ha ka ban trei shitom ryngkat lang bad ka UIDAI lem bad ki tnad bapher bapher khnang ban nangpynbha shuh shuh ia ka jingai jingshakri ha kaba iadei bad ka jingpynrung kyrteng Aadhaar hapoh Meghalaya bad ban pynthikna ba man la ki nongshong shnong kin ioh ia ka jingituh kyrpang bad ia ki jingmyntoi bapher bapher lyngba ki skhim ka Sorkar Pdeng.