Ioh pdiang ka Meghalaya ia ka khusnam ‘3rd LDC Excellence Award 2023’

Syllad | The Rising MeghalayaDecember 19, 2023

Ka Meghalaya State Load Despatch Centre (SLDC) haka 18 tarik Nohprah, ka la shah pynkup burom da ka “3rd LDC Excellence Award 2023” ha ka thup jong ka Emerging SLDC ha ka jingialang kaba la long hapoh Indian Institute of Technology (IIT) Delhi.

Kane ka jingjop kaba khraw ka dei kaba la pynkhamti da ka kynhun ki shemphang kiba la ai ka jingithuh ia ka jingtreikam kaba iadei bad ki SLDC bad halor ka jingtrei shitom bad ka jinglah treikam ha kaba iadei bad ki kam bording ilektrik.

Ka GRID-INDIA, ha ryngkat ka jingiatreilang bad ka FITT, IIT-Delhi, ki la pynlong ia kane ka prokram da kaba sam ia ka khsusnam ‘3rd LDC Excellence Award’ bad ka ‘12th GRID-INDIA Power System Awards (GIPSA),’ia kaba la tip mynshuwa kum ka POSOCO Power System Award.

Ha kane ka prokram la ia don lang ruh u Myntri ka Cabinet uba khmih ia ka Tnat Power and New & Renewable Energy, u Raj Kumar Singh kum u Kongsan.

Na ka liang u Bah A Kharpan, Director (Transmission) ka MePTCL, bad u Bah T Gidon, Superintending Engineer kaState Load Despatch Centre (SLDC), Meghalaya, ki la shimti ia katei ka khusnam na ka bynta ka jylla Meghalaya.

“Ngi sngew sarong bad sngewnguh shibun halor ka jingioh pdiang ia kane ka khusnam. Kane ka khusnam ka long ruh kum ka sakhi halor ka jingtrei shitom bad ka jingkut jingmut jong baroh ka kynhun ka SLDC Meghalaya ban pynthikna ha kaba iadei bad ka jingiaid beit iaid ryntih ha ki jingtreikam kiba iadei bad ka kam sam bording bad ki jingtreikam kiba iadei bad kane ka bynta ha ka jylla.Kane ka jingjop kan ym lah ban long khlem ka jingkyrshan bad ka jingtrei shitom jong ka kynhun kaba trei khlem shongthait,” ong u Sanjay Goyal, IAS bad CMD ka MeECL.

Kane ka khusnam LDC Excellence Award kan iai bteng kum ka nongai mynsiem na ka bynta ka kynhun SLDC ka Meghalaya ba kan bteng ban ioh ia ka jingjop ha ki sngi ki snem ki ban dang wan.