Ioh pdiang ka Meghalaya ia ka khusnam ODOP-2023

Syllad | The Rising MeghalayaJanuary 3, 2024

Ha kawei na ka jingjop kaba wanrah ka jingsarong ia ka jylla, ka Meghalaya haka sngi Balang ka ioh pdiang ia ka khusnam Second Runners-Up Award hynne ha ka jingsam khusnam “ODOP Awards 2023” ba la pynlong da ka Department for Promotion of Industry and Internal Trade ha Pragati Maidan, New Delhi.

Kane ka jingjop jong ka jylla kalong halor ka jingtrei shitom na ka bynta kyntiew ia kawei ka mar na kawei ka District ne One District One Product (ODOP).

Ia kane ka jingialang Aatmanirbhar Bharat Utsav bad National ODOP Awards la wan plie da u Dr S Jaishankar, External Affairs Minister jong ka India. Kane ka jingsam khusnam ka long ruh ban rakhe ia ki sienjam jong ka jingtrei shitom ki jylla, Union Territoty, District & Indian Mission ban pynurlong ia ka jingiohi jngoh jong ka Aatmanirbhar Bharat lyngba ka ODOP.

Na ka liang u Myntri Rangbah ka jylla u Conrad K Sangma, ula ong, “Ka jingioh pdiang ia kane ka khusnam ka long ka jingai mynsiem ia ki nongrep ki jong ngi bad ki nongshna bad thain kti kiba la trei shitom ban pynmih ia ki mar kiba kyrpang ki jong ki kiba la lah ban pyninam ha ki rynsan hapoh ka ri bad shabar jong ka ri. Ka jingjop ka jong ngi ia ka khusnam ODOP Award ka leit sha  jingshim ia ki sienjam, ki prokram, ka jingpynmih ia ki mar kiba kyrpang, Geographic Indication (GI) bad ka jingkhlain ha kaban pyniaid iew ia ki. Ka sorkar jylla ka pynpaw ka jingsngewnguh ia ka Department for Promotion of Industry bad Internal Trade bad ka Ministry of Commerce kaba la ai jingithuh bad jingiaroh ia ki sienjam bad ki jingtrei jong ka jylla”.

Ia kane ka khusnam la na ka bynta ka sorkar Meghalaya la pdiang da u Commissioner and Secretary ka jylla u Dr Vijay Kumar.

Ha ka jingkren u Dr Vijay Kumar D ula ong, “Kane ka jingioh pdiang ia kane ka khusnam ka long ka jingithuh ia ka jingtrei shitom jong ki paidbah ka Meghalaya. Ngi kut jingmut skhem ban tei ia ka jylla ka ban lah ban ieng hi na lade da kaba pyninam ia ki mar kiba la pynmih ha ka jylla. Kane ka khusnam ka ai mynsiem ia ngi ba ngin bteng ban iaid shakhmat ban pynmih ia ki mar kiba kyrpang bad paka bad ban iatreilang bad ki kynhun kiba nabar ri na ka bynta ban pynneh pynsah ha ki bynta bapher bapher. Ka long ka burom iaka jylla ban ioh ia ka jingithuh kum ka Top 3 States ha ka ODOP Awards 2023.

Ka jylla Meghalaya ka trei shitom ban kyntiew ia ka ODOP (One District, One Product) lyngba ki sienjam bapher bapher bad ka sorkar kala pynsngewthuh ruh sha ki paidbah halor ka ODOP scheme, ban pynthikna ba ki mar kin long kiba bha, ban pynbiang ia ki jingdonkam ha kaba iadei bad ka jingpynmih bad jingpyniaid iew bad ban pyntreikam ia ka rukom rejistar. Nalor kata ki ioh ruh ia ka jingkyrshan ha kaba iadei bad kajingpynmih ia ki mar kiba kyrpang, ka jingwanrah ia ki kor teknoloji, ka jing pynlong ia ki workshop bad kiwei kiwei bad ki sienjam.

Lah ban kdew ba ka jylla Meghalaya ka la ioh ia ka jingjop ha kaba shalan ia u Sohniamtra Khasi (Khasi Mandarin) shapoh Dubai bad ruh ban wanrah ka jingiadei kaba jan ha ka iew ka hat.