Ioh pdiang ka Meghalaya ia ka song pisa kaba T.135.08 klur hapoh ka PMKKKY: CM

Syllad | The Rising MeghalayaSeptember 19, 2023

U Myntri Rangbah ka jylla u Conrad K Sangma mynta ka sngi ba Ar ula pyntip hapoh ka iingdorbar Assembly ba ka sorkar jylla ka la ioh pdiang ia ka song jingiarap pisa kaba haduh T.135.08 klur kaba hap hapoh ka Pradhan Mantri Khanij Kshetra Kalyan Yojana (PMKKKY) naduh ba la pyntreikam ia ka kat haduh mynta.

Haba jubab ia ka jingkylli ba la wanrah da u nongmihkhmat ka seng UDP napoh Shella u Bah Balajied K Synrem halor kane ka phang, u CM u la ong ba ka sorkar ka la ioh pdiang haduh T.9,67 klur lyngba kane ka skhim na ka bynta u snem 2022-2023.

Na ka liang u Conrad Sangma u la ong ruh ba ia kane ka skhim ba la pyntreikam lyngba ka PMKKKY ha ki bynta jong ka Sohra ki kynthup halor ka jingpynbha ia ka jingpynpoi um shapoh circuit house, Sohra civil sub-division, kata lyngba ka pumping water supply scheme kaba thymmai na ka shyngiar kaba don marjan ba la tip kum ka Um Them Circuit kaba kot sha ka T.21,80,600 bad ka jingshna ia ka jaka pynlang um slap na ka bynta ka circuit house, Sohra civil sub-division kaba kog sha ka T.31,65,000.

Halor ka mat kaba iadei bad ka District Mineral Foundation (DMF) fund ia kaba u Bah Synrem ula pan jingtip la kito ki jaka tih par kiba la shah ktah ki dei ne em kiba la shim kongsan haba pyntreikam ia ka mangtyngka, na ka liang u CM u la ong kumba la kdew katkum ki kyndon ka jingithuh ia ki jaka kiba shah ktah ka dei ka mat kaba hap ban khmih bniah.

U la ong ruh kumba ka kyrteng la kdew ba kane ka district mining fund, kane ka dei ka Trust ia kaba la khmih ha ki kyrdan jong ki district ha kaba u deputy commissioner u dei u chairman ban bishar bniah ne screening bad ban mang ne sanction ia ki project, bad na ka liang ka sorkar kam tuklar ei ei ruh ha kaba iadei bad kum kine ki jingjied bad ki jingpang pisa.

Nalor kata u MLA ka Shella u la pynpaw ruh ka jingsngewkhia halor ka jingbym kynthup ia ki MLA kum ki dkhot jong ka DMF watla ki tip kham bha ha kaba iadei bad ki skhimia kiba dei ban pyntreikam hapoh ka district.

Haba jubab ia kane u Sangma u la ong ba la pynmih ia ka jingpyntip kaba thymmai da ka sorakr halor kane ka bynta ha ka 22 tarik u Nailar 2022, ha kaba ki MP bad ki MLA jong ki district ruh ki shah kynthup kum ki dkhot jong ka DMF. Nalor kata u la pynthikna ruh ban pynkynmaw biang ia ki bor district halor ka jingdonkam ban pyntreikam ia kane ka jingpynbna kumba ka dei ban long.

Ha kawei pat ka bynta na ka liang u CM ka jylla u la pynthikna ruh ba na ka liang ka sorkar jylla kan wan shakhmat ha ryngkat ka kaiphot ba shisien shi snem ha kaba iadei bad ka jingpyntreikam ia ka mang tyngka.

Ia kane ka jingkular la pynpaw hadien ka jingkyrpad da u nongialam ka liang pyrshah AITC uba dei ruh u CM barim ka jylla u Mukul Sangma uba la ban jur halor ka jingdonkam ban pynthikna halor ka jingpyniaid beit ia ka rukom pyntreikam ia kane ka mang tyngka.