Ioh pdiang ka MHIS artylli ki khusnam ha ka “Arogya Manthan 2023”

Syllad | The Rising MeghalayaSeptember 26, 2023

Ka  Nodal Agency ka jylla ka Megha Health Insurance Scheme (MHIS) ka la ioh pdiang ia ki artylli ki khusnam shibynta kum ka jingithuh ia ka jinglah ban pyntreikam ia ka skhim haka ‘Arogya Manthan 2023’ ha ka jingialang jong ka ‘National Health Authority’ kaba la long ha ka 25 bad 26 tarik mynta u bnai ha New Delhi.

Ka State Nodal Agency Meghalaya ka la ioh pdiang ia kine ki artylli ki khusnam namar ka jinglah ban pyntreikam bha na ka bynta ki jylla kiba rit. Kine ki kynthup ia ka khusnam “Ayushman Utkrishtata Award 2023” kaba dei halor ka jinglah ban aijingsumar bun eh (Kata naduh u bnai Risaw 2022 haduh u Nailur 2023) bad ka khusnam “ Ayushman Utkrishtata Award 2023” halor ka jingai jingshakri kaba mar iaryngkat hapdeng ki kynthei bad shynrang (Kata naduh u bnai Risaw 2022 haduh u Nailur 2023).

Ka jingpynlong ia ka ‘Arogya Manthan 2023’ ka long kum ka dak ban rakhe ia ka jingiaid lynti kaba 5 snem ha ka jingpyntreikam ia ka AB PMJAY program, kaba thmu ha kaba iadei bad ki lad aijingsumar sha ki million ngut ki nongioh jingmyntoi naduh ba la plie ia ka ha ka 23 tarik u Nailur 2018.