Ioh pdiang ka MIDC ia ka khusnam National Award na ka bynta ka jingtreikam kaba jop

Syllad | The Rising MeghalayaDecember 9, 2024

Ka Meghalaya Industrial Development Corporation Ltd. (MIDC) ha ka 6 tarik Nohprah ka la ioh pdiang ia ka khusnam ‘National Award’ na ka bynta ki jingtreikam kaba kham tbit bad ba seisoh ha ka jingialang sam khusnam 10th National Awards function jong ka Council of State Industrial Development & Investment Corporations of India (COSIDICI) ba la pynlong ha Auditorium jong ka College of Veterinary Science, Assam Agricultural University, Guwahati.

Ka MIDC ka la ioh pdiang ia kane ka khusnam halor ki buit pynkylla ha ki rukom treikam kiba jop jong ka, ka jinglah ban pyniaid beit ia ki kam pisa bad ka jingtreikam kaba paka bad ka jingkyntiew ia ka roi ka par ha ki kam karkhana.

“Ha kine ki shi snem shiteng ba la dep, ngi la pyrshang shibun ki sienjam ban pynthikna ba ka MIDC ym tang ba kan long kaba lah ban kamai pisa hynrei ruh kan buh ia ka jingthew jong ka jingbha bad janai kum ka karkhana bad ka kompeni bei tyngka,” ong u James P.K. Sangma, Chairman ka MIDC uba la ia don ryngkat lang kum u Symbud Kongsan ha ka jingialang ha kane ka sngi.

“Kane ka khusnam mynta ka sngi ka dei ka jingithuh ia ki sienjam ba kongsan kiba ngi la pyntreikam, kata kynthup ia ki rukom treikam ba tbit ha ka liang ka pisa tyngka, ki lad jingbud ryntih kiba pyrkhing, ka jingiamir jingmut lang jong ka kynhun bad ka jingbuh ia ki kyndon na ka bynta ki jingtreikam kiba iaid beit iaid ryntih,” u la ong.

Ha kaba sdang jong une u snem, ka MIDC ka dei tang ma ka, ka Corporation na Meghalaya kaba la ioh ia ka jingpynskhem na ka ISO na ka bynta ka jingbha bad ka jingpynneh pynsah, kata da kaba ioh ia ki ISO 9001:2015 bad ISO 14001:2015.

Ka Corporation ka la long ruh ka bynta ba kongsan ban wanrah ia ki jingbei tyngka ba khraw sha ka Jylla Meghalaya, kata kaba kynthup ia jan kumba T.200 klur ka jingbei tyngka da ka M/s Varun Beverages Ltd, kaba dei kawei na ki bottling unit ba heh tam jong ka PepsiCo ha ka pyrthei.

U Hans Raj Verma Director General ka COSIDICI’s uba dei ruh u ophisar IAS barim u la iaroh ia ka jingaiti lut jong ka MIDC da kaba ong ba ka Corporation ka la buh ia ka nuksa kaba phylla na ka bynta kiwei ki Corporation pynroi kam karkhana bad bei tyngka jong ki jylla da ki rukom treikam bathymmai jong ka, ka jingaiti ha ka roi ka par kaba kynthup lang ia baroh, bad ka jingpynleit jingmut halor ka jingpynneh pynsah.

Nalor kata ha kane ka jingialang pynkup burom la ia don lang ruh u Ajanta Neog, Myntri Pla tyngka ka Sorkar Assam nalor kiwei pat ki ophisar bad ki riew pawkhmat na kylleng ka ri kiba don bynta ha ki jaka treikam bei tyngka bapher bapher jong ki jylla nalor kiwei pat.