Ioh pdiang ka NIT Meghalaya ia ka khusnam 10th Higher Education Excellence Award

Syllad | The Rising MeghalayaOctober 22, 2024

Ka National Institute of Technology (NIT) Meghalaya ka la ioh pdiang ia ka khusnam “10th Higher Education Excellence Award” ha ka kyrdan Excellence in Creating Employment haka 19th FICCI Higher Education Summit 2024 kaba la long haka 18 tarik u Risaw ha New Delhi.

Ia kane ka khusnam la ai da ka Federation of Indian Chambers of Commerce & Industry (FICCI), kum ka jingithuh ia ki jaka pule kiba la noh synniang shibun bad ban long ki nonglamkhmat ha ka liang ki lad jingpule kiba kham shalor. Ka NIT Meghalaya ka la ioh ia ka jingithuh halor ka jingtrei borbah jong ka ban saindur ia ki samla bad ban plie ia ki lad ha ka liang ka ioh kam ioh jam.

Ha kane ka jingialang sam khusnam la wan iashim bynta da ki riew pawkhmat ha ka liang ka pule puthi, ki heh sorkar bad ki nongialam ba pawkhmat na kylleng ka ri. Ka FICCI’s Higher Education Excellence Awards’ ka dei kaba la pynbna hadien ka jingbishar bniah ia ki jaka pule ha kiba bun ki kyndon kiba kongsan.

Ha kaba iadei bad kane ka jingjop na ka liang ka NIT Meghalaya lyngba u kyrwoh ka pynpaw ka jingsngew nguh ia ki nonghikai, ki staff, ki samla pule bad baroh kiba ia don bynta kiba ka jingtrei shitom lang ka jong ki ka la ioh pdiang ia kane ka jingithuh.

Ka la bynrap ruh da kaba ong, “Ngi dang iai neh ha ka thong jong ngi ban kyntiew ia ka jingpule kaba kham shalor bad ban wanrah ia ka jingktah kaba neh ha ka imlang sahlang lyngba ka jingpyrshang ba bteng jong ngi ban pynioh ia ka jingnang jingstad bad ka kam ka jam.”