Ioh pdiang ka Shillong ia ka Transport Award hapoh ka Ri lyngba ka project STEMS

Syllad | The Rising MeghalayaOctober 29, 2023

Ka Nongbah Shillong ka la ioh pdiang ia ka khusnam “City with the Best Record of Public Involvement in its Transport Planning” na ka bynta ka project “Shared Commuter Service” ha East Khasi Hills (Shillong)”.

Kane ka dei ka sienjam ba la pyntreikam da ka “Sustainable Transport and Efficient Mobility Society (STEMS)”, ha ka jingpynlong ia ka 16th Urban Mobility India Conference and Expo 2023, kaba la long naduh ka 27 haduh ka 29 tarik mynta u bnai ha ka Nongbah New Delhi.

U Manoj Joshi, Secretary –ka Ministry of Housing and Urban Affairs ka Sorkar India u la aiti ia kane ka khusnam sha ka STEMS ha ka jingialang kaba la long haka sngi U Blei.

Ia kane ka khusnam la shimti da ka Kong Isawanda Laloo, kaba long ka Secretary ka sorkar jylla bad ka CEO jong ka STEMS ha  ryngkat bad ki dkhot jong ka STEMS.

Kiwei pat kiba la ioh pdiang ia ka khusnam ha ki bynta bad kyrdan bapher bapher ki kynthup ia ka Delhi, Lucknow, Srinagar, Bhubaneswar, Kochi bad Jabalpur.

Ka STEMS kala ioh pdiang ia kane ka jingithuh kaba nyngkong eh hapoh ka ri namar ka jinglah ka jong ka ban pyndon bynta lang ia baroh ki kynhun kiba ia don bynta, kata khamtam ia ki nongialam shnong, ki bor pyniaid skul nalor ki kmie ki kpa nalor ka jingshim ia ki sienjam ban iamir jingmut lang bad ki tnat sorkar bapher bapher, kata kum ki bor pyniaid district jong ka East Khasi Hills, Shillong Traffic Police, Tnat PWD, MTC bad kiwei kiwei ha kaba plan ban pynwandur ia kane ka jingthmu jingthmu.