Ioh pdiang khusnam ka shnong Moolamylliang kum ka shnong kaba khuid kaba suba

Syllad | The Rising MeghalayaNovember 30, 2023

Ka Dorbar Shnong Moolamylliang, East Jaintia Hills kaba la pawkhmat bha halor ka jingkhuid bad ka jinglah ban pynitynnad da ki rong ki rup bad ki jingthaba khamtam ha ka samoi Christmas bad Snem Thymmai ka la ioh pdiang ia ka khusnam ‘IconSWM-CE Excellence Award 2023’ namar ka jingkhuid ha ka ‘13th International Conference on Sustainable Waste Management & Circular Economy and IPLA Global Forum 2023,’ kaba la long ha ka 29 tarik mynta u bnai ha Mumbai.

Ia kane ka khusnam la aiti sha u Rangbah Shnong ka Moolamylliang da u Consul General jong ka Kingdom of Netherland u Bart De Jong bad u President jong jong ka ISWMAW u Sadhan Ghosh ryngkat ka jingiadon lang ki heh ki hain. Na kane ka jylla Meghalaya la sakhi lang ia kane ka jingioh khusnam da u Environmental Engineer jong ka Meghalaya State Pollution Control Board u Bah S Syiem ryngkat u Principal jong ka Synod College Shillong u Dr. RM Lyngdoh.

Kane ka shnong ka la kylla pawkhmat namar ka jingkhuid jong ka bad khamtam ha ka aiom Christmas ha kaba la sakhi ruh ia ki rong ki rup bad ki jingpynthaba kiba itynnad bad kiba khring shibun ia ki nongwan shangkai na kylleng. 

Lyngba ka jinglamkhamt jong u Rangbah Shnong u Bah Apmon Pachang bad kiwei de ki nongkitkam shnnong la ju pynlong ruh ia ka jingthung ia ki tynrai dieng ha kylleng ki kyndong kynshrot jong kane ka shnong ha kaba la rakheruh ia ka Khristmas ha ka rukom kaba pher na kiwei pat lyngba ka jingtrei ryngkat jong ki paidbah nongshong shnong.