Ioh pdiang u nongrep na West Jaintia Hills iaka khusnam “Innovative Farmers’ Award”

Syllad | The Rising MeghalayaJanuary 4, 2025

Uwei u nongrep na West Jaintia Hills District uba tip kyrteng kum u Bah Iowluti Ymbon na ka shnong Mukhap, Laskein Block, West Jaintia Hills District u la ioh ban pdiang ia khusnam “Innovative Farmers Award” 2025 ha ka Regional Agriculture Fair ba lah pynlong da ka Assam Agricultural University ha Jorhat.

Ia kane ka khusnam la aiti da u Atul Bora, Myntri jong ka kam rep kam riang bad ka kam ri jingri jong ka jylla Assam, u Kamakhya Prasad Tasa, Member of Parliament na Kaziranga Constituency, Assam bad u Dr. Bidyut C Deka, Vice Chancellor jong ka Assam Agricultural University.

Une u nongrep u la don bynta ban iatreilang bad ka Krishi Vigyan Kendra (KVK), Jaintia Hills ha ki kam ba iadei bad ka kam rep kam riang bad kham kongsan eh bad ka kam ri jingri.

Ka jingjied (nominate) ia une u nongrep ruh ka iaid lyngba ka Office jong ka Krishi Vigyan Kendra, Jaintia Hills.

Ha kane ka sngi kaba khraw, lah synran lang ia u Bah Iowluti Ymbon da u Subject Matter Specialist (AH & Vety) Dr. Rimiki Suchiang, Senior Research Fellow F. Sutnga bad u K Passah na KVK Jaintia Hills.