Ioh pyllait iaka mrad kaba pynbha iaka koit ka khiah ka khyndew

Syllad | The Rising MeghalayaAugust 9, 2020

Uwei u nongshong shnong jong ka shnong Shangpung Pohshnong West Jaintia Hills District ula ioh ban pyllait im ia ka mrad kaba la jan duhjait bad kadei ruh ka mrad kaba kongsan bha kaba iarap haka ban pynioh iaka koit ka khiah jong ka khyndew.

Une u nongshong shnong ka Shangpung Pohshnong udei u Treilang Sutnga, ula ioh ban pyllait im iaka mrad kaba la tip kum ka ‘Rbai’ ne ka ‘Pangolin’ ha ka miet 7 tarik u Nailar (August) 2020 kaba la wan poi ha phyllaw iiing jong ki.

Ïa kane ka mrad Pangolin u Treilang ula aiti ha kajuh ka miet sha ka tnad kam khlaw Wildlife Division, Jowai, Jaintia Hills District.

Ka tnad Wildlife hadien bala dep pynlong iaka jingjurip iaka jinglong jingman bad ka koit ka khiah jong kane ka mrad kila pyllait noh shapoh ka khlaw kyrpang ka sorkar ka Narpuh Wildlife Sanctuary.

“Kane ka mrad ka dei kaba kyrpang bad ka hap haka kyrdan Schedule I jong ka Wild Life (Protection) Act, 1972.

Kane ka mrad ka dei kawei na ki mrad kaba la jan duh jait ha ka ri jong ngi na ka daw ba bun ki briew ki pyniap iaka ban pyndonkam iaka doh lane ia ka snieh jong ki da ka jingngeit bieij ba ka long ka dawai. Hynrei kane ka dei tang ka jingngeit bieij ban shna pisa bad ka long kaba beaiñ ban siat, pyniap lane ban khaïi ia katei ka mrad lane ia ki bynta jong ka met jong ka. Ia uno/uno lane kano/kano u/ka briew ba donkti ha kaba siat, pyniap lane ban khaii ia katei ka mrad lane ia ki bynta jong ka met jong ka yn pynshitom da kaba shah set phatok haduh 7 snem bad kan kynthup ruh ia ka kuna kaba yn duna i aka 25,000 tyngka katkum ka Ain ba la tip kum ka Wild Life (Protection) Act, 1972.

Kane ka mrad kadei kaba donkam bha ban pynneh pynsah namar ba ka bam ia ki kynja khniang, ki puit bad kumjuh ruh ia ki dkhiew “Natural Pest Controller and Soil Care Taker”. Ki dei ki jait mrad ki ba iarap ruh ha kaban pynsboh ia ka khyndew. Ki riew ieit mrad kylleng ka pyrthei ki ia leh ban pynsngewthuh ia ki jingdonkam jong kine ki mrad bad ban iada ia ka na ka jingduh jait,” la ong ka Sahep jong ka tnad Wildlife Division Heisa Lato.

Ka Ophis jong ka Divisional Forest Officer, Jaintia Hills Wildlife Division ka kyntu ia ki paidbah ba kin don ka mynsiem bad ai lad jingiada bad tyngkai ia kum kini ki jait mrad bad ia kiwei ruh ki jait mrad khlaw kynthup iaki sim ki doh ban im suk im sain ha ki jaka sah jong ki.