Ioh pyllait im ki saw ngut iaki ar ngut ki ‘thei na ka jingiap ngam jyllop ha West Jaintia Hills

Syllad | The Rising MeghalayaJuly 5, 2021

Ki saw ngut shi paralok kila ioh ban pyllait im ia ki arngut ki kynthei na ka jingiap ngam jyllop haka kawei ka wah kaba la tip kum ka Syllek (Tyngkla) kaba don hajan ka shnong Mowkyndeng, West Jaintia Hills District haka 4 tarik une bnai.

Kine ki ar ngut ki kynthei kiba dei shipara ar kmie kila lait na ka tyrsim jong ka jingiap ki dei ka Finie Suchiang 18 snem ka rta bad Arkini Suchiang 12 snem ka rta kiba na ka shnong Mulieh.

Ki saw ngut ki samla kiba iarap ban pyllait im ia kine ki kynthei na ka jingiap ki dei u Waiphangki Pala ba la juh khot ieid U Maidong (22 snem), U Thranglut-o-ki Pala (17 snem), U Onyxstone Pala (19 snem) bad U Kyrpang-i-man Suchiang (19 snem).

Katkum ka jingiathuh jong u Waiphangki Pala, u ong ba kine ki khynnah kynthei ki ialehkai ha kane ka wah bad kynsan u iohsngew ba kawei na ki ka pyrta bad khot jingiarap, khlem da pynslem shuh u la noh shapoh um bad ula jngi ban iarap ia kane ka kynthei. U la ialeh tyngeh ban tan bad pyllait iaka Finie.

Hadien ba dep pyllait iaka, kala iathuh ba don sa kawei ka khynnah shapoh um.

Mar mar U Waiphang lem bad ki 3 ngut ki samla kila jngi bad ngam biang shapoh um ban wad ia kane ka khynnah.

Hadien kumba 3 ne 4 minit jong ka jingwad, u Thranglut-o-ki u la lap ia kane ka khynnah bad mar mar ki la iasei iaka napoh um bad kane ka khynnah kam tip briew shuh ki dang mut ba kam don shuh. Kumta kila ban iaka naka shadem bad pyrsad mynsiem ruh na ka shyntur jong ka. Hadien kumba katto katne por kane ka khynnah kala prie ia ka um bad kala lah ruh ban ring mynsiem biang hynrei kam pat tip briew.

Kine ki saw ngut mar mar kila pyntip ia kane ka jingjia sha kiba ha ïing jong kine ki khynnah bad la pynkit iaka Arkini Suchiang Laskein CHC bad hadien la pynkit pat iaka sha Dr. Norman Tunnel Hospital, Jowai. La iathuh ba kane ka khynnah kala lait na jingshitom bad ka bor met jong kala khlain.

Na kaliang u Waheh Chnong Mowkyndeng u ma Syrpai Synnah, ula ai khublei bad pynpaw ka jingsngewnguh ia kine ki saw ngut ki khun samla ka shnong kiba la leh ia kane ka kam shlur ban pyllait im ia kine ki ar ngut na ka jingiap ngam jyllop. Bad haka juh ka por ula kitbok kitrwiang iakine ki ar ngut ki khynnah kin ioh iaka met kaba shait kaba khlain.