Ioh pyllait ki BSF haduh 64 tylli ki masi & muid, kurup 12,000 kilo ka Shini ba thmu khaii tuh sha Bangladesh

Syllad | The Rising MeghalayaSeptember 14, 2024

Ki shipai Border Security Force (BSF) ka Meghalaya ha ka 13 tarik Nailur ki la lah ban pynpulom noh ia ka kam khaii beain da kaba ioh ban kurup noh haduh 64 tylli ki masi bad muid na ki bynta khappud jong ka ri ha ka thain West Jaintia Hills District ia kiba la thmu ban khaii tuh shapoh Bangladesh.

Hadien ba la ioh ia ka jingtip kaba bniah, ki BSF na ka 4th Battalion ki la pynlong ia ka jngkhynra kaba kyrpang hajan ki bynta khappud jong ka ri ha kaba ki la ioh ban pyllait noh haduh 64 tylli ki masi ia kiba la buhrieh hapoh kawei ka jaka khlaw, kata ia kiba la thmu ban khaii tuh shapoh Bangladesh lyngba ki jaka khappud jong ka District.

Hadien ia kine ki masi ba la ioh kurup la aiti noh shapoh police station na ka bynta ban leh shuh shuh ia kaba donkam.

Ha kawei pat ka jingkhynra, ki BSF ki la ioh ban kurup noh haduh 12,000 kilo ka Shini ba la pynkit da ki laitylli ki kali Bolero pickup ia kiba la pynkhreh ban khaii beain shapoh Bangladesh lyngba ki jaka khappud jong ka East Khasi Hills.

Ha ka jingiakhun ban khanglad ia ki kam khaii beain lyngba ki jaka khappud ka India -Bangladesh, ki BSF ka Meghalaya ki la ioh ban kurup haduh palat 800 tylli ki masi bad haduh 2310-ton ka Shini ia kiba la thmu ban khaii beain shapoh Bangladesh lyngba ki jaka khappud bapher bapher ka Jylla naduh u bnai Kyllalyngkot 2024.