Ioh pyllait ki BSF ia 37 tylli ki Masi ba thmu shalan beain sha Bangladesh

Syllad | The Rising MeghalayaJuly 19, 2023

Ki shipai Border Security Force (BSF) Meghalaya ha ka 18 tarik mynta u bnai ki la ioh ban pyllait ia 37 tylli ki masi ia kiba la thmu ban shalan beain shapoh Bangladesh na ki bynta khappud jong ka East Khasi Hills.

Hadien ba la ioh ia ka jingtip kaba bniah, ki shipai BSF na ka tnat 193 Bn ki la pynlong ka jingkhynra kaba kyndit bad ioh ban kurup noh ia ki 37 tylli ki masi ia kiba la thmu ban shala beain.Hadien ka jingiatyngkhuh bad ki shipai kine ki nongkhaii beain ki la phet krad noh da kaba iehnoh sha lyndet ia kine ki masi.

Hadien kane na ka liang ki bor shipai ki la aiti noh ia kine ki masi sha ki bor pulit ba dei khmih na ka bynta ban leh ia kaba donkam.

Lyngba une u kyrwoh kane ka tnat shipai ka la pynpaw ba ka dang iai bteng ban pynlong ia kiba kum kine ki jingkhynra ha lynter ki jaka khappud khnang ban khanglad ia ki kam khaii beain bad kiwei pat ki kam pyntriem.