Ïoh pyllait ki Pulit East Jaiñtia ïaki 8 ngut ki nongbylla ba shah set

Syllad | The Rising MeghalayaJuly 9, 2019

KHLIEHRIAT: U wei u nongtrei jong ka Amrit Cement Limited u Pawan Yadav ula shah kem noh ha ki Pulit jong ka East Jaiñtia Hills District halor ka jingshah kynnoh ba u donkti ban set ïaki 8 ngut ki nongtrei bylla ka kharkhana naduh 2 tarik u bnai Naitung.

Kane ka kharkhana ka don ha Umlaper, Elaka Rymbai hajan ka shnong Mynkre, East Jaintia Hills District.

Ki phra ngut ki nongtrei kiba la shah set bad kiba la ioh pylllait da ki Pulit ki dei u Pintu Kumar Saini (27 ), u Anallal Saini (43), Jagram Saini (45), u Bhagwan Sahay Saini (28), u Durgalal Saini (41), u Kamlesh Kumar Saini (21), u Panlari Kumar Sain (21) bad u Khemresh Saini (26) kiba baroh ki dei na Rajasthan.

Ka khubor Pulit ka iathuh ba ia kine ki phra ngut nongbylla la ioh pyllait noh iaki haka sngi Nyngkong bad la kem ia Pawan Yadav, uba dei uwei na ki nongtrei katei ka kharkhana dewbilat.

La kynnoh ba une u Pawan ula set iaki nongbylla hadien ba kila dawa iaka bai bylla, hynrei la pynbor iaki ban trei khlem bai nong bad hadien ba kine ki nongbylla kila kyntait la set noh iaki hapoh ka kamra kaba don ha katei ka kharkhna.

Dei hadien ba uwei na ki nongbylla ula lait phet na katei ka kamra haka sngi U Blei bad ula pyntip mar mar sha ki pulit kila shimkhia ban leit pyllait iaki ka sngi Nyngkong.

Halor kane ka jingjia ki pulit kila kem bad register case pyrshah ia u Yadav bad la pyngngat ïa u hapoh ka kyndon aiñ ba set beaiñ bad lehbein ïaki briew katkum ka section 367 IPC bad ka jingtohkit ki pulit halor kane kala iaid shakhmat.