Ioh rah ka Firstlin Roy Kam iaka nam Miss Rynji

Syllad | The Rising MeghalayaDecember 20, 2022

Ka Firstlin Roy Kam kaba pule BA 6th Semester ha Kiang Nangbah Government College, Jowai kaba na ka shnong Moolephaw Nongjngi kala ioh rah iaka nam bhabriew tam haka Miss Rynji Falls 2022.

Ia kane ka jingiakop bhabriew la pynlong da ka Dorbar Shnong Cham Cham bad ka Cham Cham Tourism Promotion Society haka Rynji & Sahksaw Festival 2022 haka sngi Thohdieng bad ka Saitjain ka taiew kaba la dep.

Ka lahduh ba ar bad kaba lai kalong ka Hakani Phawa kaba pule BA 6th Semester ha Kiang Nangbah Govt College, Jowai kaba na Tuberkmaishnong bad ka Jingieit U ai Timung kaba na Barato.

Ha kane ka tamasa la pynlong shibun jait ki prokram kaba kynthup iaka jingiaid kjat trekking, jingshonglieng ha Sahksaw, ka jingiakop shongdur bad kiwei kiwei. La pynshongshit ruh da ki jingtem DJ bad Dance show na ka kynhun Phoenix.

Kane ka tamasa wat la ka long ka sien kaba nyngkong, hynrei ka jingwan tuid u briew sha kane ka tamasa kala long kaba shongshit bad ai pynsiem iaka shnong ban pynlong shuh shuh ia kum kine ki tamasa ban kyntiew iaka kam jngohkai ha katei ka thain.

U Kyrmen Shylla Myntri sorkar bad u MLA ka thain ula wan sakhi kum u kongsan bad nakaliang ka shnong kala ai da ka dorkhat sha u ban pynbiang iaki jingdonkam kane ka jaka kaba la khring ia kiba bun kiba na bar bad ki trai jylla.