Ioh rah ka Ibalari Sari ia ka nam Miss Seinraij Mukhla; pynshlur bad ai mynsiem u dolloi Jowai ia ki samla

Syllad | The Rising MeghalayaJanuary 2, 2025

Ka Seinraij Mukhla Students’ Association ka la rakhe ia ka ‘Silver Jubilee Youth Week’ jong ka kaba la sdang naduh ka 25 tarik Nohprah 2024 da kaba pynlong ia ki prokram bad ki jingiakop bapher bapher kiba thmu ban wanrah ia ka jingiatylli, ka jingsngewnguh ia ka kolshor ha kaba la wan iashim bynta shitrhem da ki samla jong ka Seinraij Mukhla.

Ia kane ka taiew jong ki samla la sdang da ka jingiakop mareh marathon kaba 3.5 km ha ka shnong Mukhla Nongrim, ha kaba ki la don haduh 40 ngut ki nongiashim bynta. Ki nongjop ki long u Slowly Sumer, u Lakhon Lyngdoh, bad u Emanuel Sari ha ka kyrdan ki shynrang, bad ka Arwanki Sari, ka Leona Lyngdoh, bad ka Neida Sumer ha ka liang ki kynthei.

Hadien kane ka marathon, la pynlong ia ka jingialang plie ia kane ka jingrakhe ba la pyniaid da u Vice President u Dawpait Suna ha ka jingiadon lang ki nongshah khot sngewbha ba kongsan kiba kynthup ia u Dabunki Sari, His Suna, bad Player Suna kiba ha ka jingkren ki la ban jur halor ka jingkongsan ka jingiashim bynta jong ki samla.

La pynlong ruh ia ka prokram halor ka kolshor kaba pynpaw ia ki sap ki phong jong ki samla na ki shnong bapher bapher ha kaba ki nongjop ki kynthup ia ka Seinkyntu Niamtre Mukhla Nongrim, Mukhla Umlangshor bad Dong Lumpohshnong.

Ka la don ruh ka jingiamir jingmut bad ki dkhot kiba la san halor ka jingkongsan jong ka Silver Jubilee bad ka jingpynlong ia ki prokram kiba iadei bad ka kolshor bad ki jingleh niam, ha kaba ki nongiashim bynta ki la ioh jingtip halor ki jinglehniam ba kongsan kum ka Biskurom Pooja, Ske Khlo Pooja, Knia Rynkaw, bad ka jinglehniam na ka bynta kiba iap jong ka Niamtre.

Ia ka Extempore Speech Session la pynlong ha ka 26 tarik Nohprah ha kaba ki nongjop ki kynthup ia Slowly Sumer, Dafika Suna, Ekmenroi Sari bad Rosme Sari, katba ha ka Quiz Competition ki la don shiphew kynhun kiba iashim bynta ha kaba ka kynhun jong ka Roseme Sari, Yodaki Suna bad Pynshai Shylla bad ka kynhun jong ka Pretty Suna ki la wan ha ka kyrdan ba shakhmat. Katba ha ka iakop siatkhnam ki nongjop ki kynthup ia u Player Suna, Hamieh Suna bad Ryngkat Sumar.

Ha ka iakop iatan tyllai ha ka liang ki shynrang la ioh rah da ka kynhun Sari Group ha ka liang ki kynthei da ka kynhun ka Philis Shylla bad ba ar kynhun ka Phidalin suna bad ka kynhun u Callten Sari ha ka kyrdan ba ar. Ha ka ialehkai Dat Mo Point kaba dei ka jingialehkai tynrai jong ki Pnar hapdeng ki kynthei ka kynhun Team B ka la rah ia ka nam lahduh bad ka Team A ha ka kyrdan ba ar.

Ha ka sngi kut jong ka jingrakhe la pynlong ia ka jingiakop Mr bad Miss Seinraij Mukhla 2024, ha kaba ka Ibalari Sari ka la ioh rah ia ka nam lahduh bud sa ka Saka Sari bad ka Dafika Suna. Katba ha ka liang ki shynrang ia ka nam lahduh la ioh rah da u Ekmenroi Sari bud sa u Samuel Shylla bad u Moonlight Sari.

Ha kane ka sngi la ia don lang ruh u Puramon Kynjing Daloi Elaka Jowai kum u Kongsan nalor kiwei pat ki nongshah khot sngewbha, kata u Wanbha Lyngdoh, ki dkhot ka ka Seinraij Mukhla bad kiwei kiwei.

Ha ka jingkren u Kongsan u la ban jur ia ka jingdonkam ban ithuh ia ki jingkyrkhu bad jingialam jong U Blei ban saindur ia ka lawei ka jong ngi. U la pynpaw ruh ia ka jinglong kyntang jong ka jingim bad u la ban jur ia ka jingdonkam jong ka jingiatylli bad ban pyndep ia ki kamram jong ka niam ka rukom. Kumjuh u la pynshlur ruh ia ki samla ba kin trei shitrhem na ka bynta ka bha ka miat hapdeng ki nongshong shnong kiba don ha ka Niamtre bad ban pynleit jingmut ia la ki jong ki jingkitkhlieh.

U Wanbha Lyngdoh ha ka jingkren u la pyrto ia ki sienjam jong ka Seinraij Mukhla Students’ Association ha kaba pynkupbor ia ki samla bad ban pynroi ia ka mynsiem iatreilang. U la pynshlur ruh ia ki samla ba kin iai bteng ban iashim bynta shithem ha kum kine ki prokram khnang ban pynneh pynsah ia la ka jong ka riti dustur.