Ioh rah ka Mawkma ia ka nam lahduh ha ka U-14 Football ba la pyniaid da ka Maraikaphon Youth Club

Syllad | The Rising MeghalayaOctober 23, 2023

Ki khynnah ialehkai na ka shnong Mawkma ki la ioh ban rah ia ka nam kum ki lahduh ha ka U-14 Football Tournament kaba la pyniaid da ka Maraikaphon Youth Club kaba don ruh hapdeng ka jingrakhe ia ka jubili ksiar ne ka jingdap ba 50 snem ia ka jingseng jong kane ka synjuk, da kaba pynliem da 1-0 ia ka Seng Samla Khliehshnong.

Kum ban shu pynkynmaw ba ha kane ka kynti kaba mynta na ka liang  ki nongkitkam ka Maraikaphon  Youth Club, ki la shim biang ia la ka jong ka sienjam ban pynlong ia ka lympung ialehkai phutbol ba kyrpang na ka bynta ki khynnah rit, kaba long kum shi bynta ban lah ban sei ne ban iarap ban pynpaw  pyrthei ia ka sap barieh kaba ki hep barit ka thain Sohra ba ki don ha ka liang ka phutbol.

Ha kane ka kynti na ka liang ka Maraikaphon Youth Club, ka la lah ba kan pynlong ia kane ka lympung ba la wan iashim bynta da 23 tylli ki klob ne ki kynhun da ka jingiarap pisa lyngba ka District Sports Promotion Scheme kaba wan lyngba ka ophis jong Deputy Commissioner ka East Khasi Hills District bad ba la pdiang ne ithuh ia ka da ka ophis ka jong u District Sports Officer ka East Khasi Hills  District.

Ha kane ka jingialehkai phainal ba la pynlong ha ka 21 tarik mynta u bnai, haba phai sha ka jingiakhun ka kylla jong ka shiteng kynta ba la pynialehkai, ka la kut shwa ha kaba khlem shym don mano mano ba ioh ban pynkhih ia ka jar. Pynban san minit hadien ba la sdang ia ka kylla miet, ka Mawkma ka la ioh ba kan pynkhih ia ka jar lyngba u Widney Kharumni bad kane ka la neh haduh kaba kut jong ka jingialehkai.

Ia kane ka phainal la wan ban sakhi bad pynshit pynshngain da Bah Evan Maxwell Basaiawmoit, President ka Sohra Sports Association kum u kongsan, u bah Sunesh Syiem Secretary ka MFA, Pa’iem Freeman Sing Syiem, Syiem ka Hima Sohra, u SDPO ka Sohra  Civil Sub Division u bah  Pynhun Syiem, u bah A. Khongsit OC Sohra Police Station, Fr.A Rongrin SDB, Principal St john Bosco Boys Hr. Sec School, Sohra,  bah Ethelbert Sawian Rangbah Shnong Maraikaphon, bah Favian Umdor Secy Shnong Maraikaphon, Shemborlang Kharwanlang Rangbah Shnong Khliehshnong, u bah Allan West, President, Secretary Seng Longkmie Maraikaphon, ki dkhot ka MYC hapoh ka jingialam  u bah Jasper Iangrai President MYC u bah Carolus W Shabong Secy  bad kiwei kiwei.                           

Ha kaba kut jong ka jingiakhun ka la don ka jingsam ia ki khusam ha kaba la sam ruh ia ki khusnam, ba shimet, kaba mynta ka kynti ka nam nongialehkai ba kynsai kane ka phainal ka leit sha Mom Mesasukher Lyndem seng samla Khliehshnong, nongap kol ba kynsai (Best Goalkeeper) ka leit sha u  Romius Swer Seng Samla Khliehshnong, noongialehkai ba kynsai ha ka lympung baroh kawei  (Player of the tournament) ka leit sha u  Banshanbor Nongrum Laitryngew Sport Club.

Kumban shu pynkynmaw biang sa shisien  ba ha ka snem ka ban wan ka Maraikaphon Youth Club kan pynlong biang ia kane ka lympung da  kaba kan kyntiew pat sha ka kyrdan iakhun ka U-15.