Ioh rah ka Shillong Lajong ia ka nam lahduh ha ka SPL, pulom ka jingthmu ioh hat-trick ka Mawlai

Syllad | The Rising MeghalayaMarch 16, 2025

Ka Shillong Lajong FC ka la ioh ban rah ia ka nam lahduh da kaba ioh rah ia ka song pisa kaba T. 6 lakh ha ryngkat ka trophy hadien ba ka la lah ban pynliem noh ia ka Mawlai Sports Club  da 2-1 ha ka lympung ialehkai football ba khatduh jong ka OC Blue Shillong Premier League 2024 ba la pyniaid da ka Shillong Sport Association kaba long ha ka 15 tarik u bnai lber 2025 ha SSA Stadium, Polo Shillong.

Da kane ka jingshah rem ka jingkhmih lynti jong ka Mawlai SC ban ioh ia ka jingjop kaba laisien kynthih (Hat-trick) ka la pulom noh. Ka Mawlai kaba la wan ha ka kyrdan kaba ar ka la ioh khur ia ka song pisa kaba T.3 lak ha ryngkat ka trophy.

Ha kane ka jingïakhun kaba itynnad bad mar ia biang bor ba la wan sakhi da ki hajar ngut ki riew ieit football, ka Shillong Lajong ka la ïoh ban thep ia ka kol kaba nyngkong ha ka minit kaba 10 jong ka kylla step lyngba u Abhay Chettri.

Haba wanphai biang sha ka kylla miet jong ka jingialehkai ka Shillong Lajong ka la ïoh biang ban thep biang sa shi kol ha ka minit kaba 76 lyngba u Samshaphrang Lato.

Na ka liang ki rangïalehkai ka Mawlai SC watla ki la pyrshang borbah ban ioh pynphai kylla ïa kine ki ar tylli ki kol ban ïoh rah ïa ka nam lahduh  hynrei ka por ka la dier palat. Hynrei watla katta ha kaba kut ka jingialehkai ka mawlai ka lah ban pynphai tang shi kol, kata haduh ka minit kaba 88 lyngba ka penalty ba la shut da u Damanbhalang Chyne.

Na ka bynta ki 20 tylli ki kol ba u la thep ha kane ka samoi, u Deibormame u la ioh ia ka khusnam kum u rangialehkai uba la ioh ban thep bun kol tam bad u la ioh pdiang ruh ia ka memento na u President ka Meghalaya Football Association u Bah Hamletson Dohling.

Ha kane ka sngi la ia don lang ruh u Myntri jong ka tnatd Sports and Youth Affairs ka Sorkar Jylla u Bah Shakliar Warjri kum u Kongsan uba la aiti ïa ka song pisa kaba T. 8 lak ba la bhah na ka sorkar jylla kum ka jingkyrshan bad ka jingïarap pisa ïa ka Shillong Sports Association.

Na ka liang u General Secrtary ka Association u Bah Dipshon L Nongbri u la ai ka jingkhublei ia u Myntri ka Tnad Sports kumjuh ia u Myntri Rangbah ka Jylla halor ka jingbteng ban ai ia ka jingkyrshan ba pura ban kyntiew ia ka football na ka bynta ka jingmyntoi jong ki samla ka Jylla hi baroh kawei.

Kiwei pat ki riew pawkhmat kiba la don lang ki kynthup ïa ki dkhot ba la kham rangbah ka SSA, ka Meghalaya State Olympic Association, Directorate of Sports and Youth Affairs bad kiwei kiwei.