Ioh ring dur ia u runar ba rong tuh ia u battery kali u rawon ha Wah Myntdu

Syllad | The Rising MeghalayaApril 16, 2025

Ka jingjyllei ka kam tuh kam thiem ha kine ki sngi kala jur bha ha sor Jowai ha kaba ki runar kim salia ban kyndang iaki iing, ban tuh umphniang kali, ki tyre, battery bad kiwei kiwei.

Ha kane ka sien la ioh ban ring dur ia u runar uba kyndang ia kawei ka kali Maruti Car ha kaba ula  rong tuh ia u battery ka kali haba shit ba shai.

Kane ka jingjia shah tuh battery jong kane ka kali kala jia haka 16 tarik Iaiong ha ka jaka kaba la tip kum ka Khyllem, ka bynta jong ka rud wah Myntdu kaba ki briew ki shait pynieng kali haba leit bam khana bad leit kai pyngngad bad khambun kiba pynieng kali ha kum kine ki por dei ki rawon kiba sngewtynnad ban leit khwai ha kane ka jaka.

Kaba lyngngoh ha kane ka jingjia shah tuh battery kali, une u runar um salia iano iano bad hapdeng u slap uba jur haka por shiteng sngi ula kyndang iaka kali bad rong tuh ia u battery.

Ki paralok kiba ioh ban ring dur ia une u runar na shilliang ka wah kila iathuh ba kila ring dur namar ba ki ipher iaka rukom leh une u briew bad kham hadien kila iathuh ia u trai ka kali uba leit khwai sha kane ka jaka

U trai ka kali haba ula ioh jingtip halor kane ka jingjia mar mar ula leit jurip iaka kali bad ula lap ba la shah tuh u battery ka kali jong u.