Ioh rung biang ka Mawlai SC sha ka final hadien ba pynliem noh ia ka Langsning da 2-1 ha ka SPL

Syllad | The Rising MeghalayaMay 9, 2024

Ka Mawlai SC kaba dei ka lahduh ha ka samoi ialehkai ba ladep jong ka SPL mynta ka kynti ruh ka la ioh ban rung sha ka final hadien ba ka la lah ban pynliem noh ia ka Langsning FC da 2-1 ha ka jingialehkai kaba la long ha ka 8 tarik Jymmang ha madan SSA First Ground, Polo.

Lyngba kane ka jingjop ka Mawlai kan iakynduh ia ka Rangdajied United FC ha ka jingialehkai Final ka ban long ha ka 11 tarik sngi Saitjain. Lah ban kdew ba ka Rangdajied ka la pynrem noh ia ka Shillong Lajong FC da 1-0 ha ka jingialehkai ia ka semifinal kaba nyngkong ha ka 7 tarik mynta u bnai.

Ka jingialehkai hapdeng ka Mawlai bad ka Langsning ka la long kaba mar ia biangbor bad kaba la wanrah ruh ka jingrisa jong ki paidbah nongkyrshan naduh kaba sdang jong ka kylla step hynrei kaba la shu kut noh khlem da don ba ioh ban pynkhih jar.

Haba bteng ia ka jingiakhun ha ka kylla miet ka Mawlai lyngba u Robert Khongriah ka la ioh ban khyrwit ia ka kol kaba nyngkong ha ka minit kaba 50. Hadien kane u Chanmite Thma u la ioh ba pyniakhkad na ka bynta ka Langsning ha ka minit kaba 57.

Ka jingiakhun kala nangkham itynnad shuh shuh namar ka jingpyrshang borbah jong ki arliang mamla ban ioh ia ka jingjop, hynrei ha ka minit kaba 68 u Kevin Rymbai u la ioh ban pynkhih jar na ka bynta ka Mawlai bad pynskhem syndon ia ka jingjop.

Kine ki artylli ki kynhun ki la dep ruh ban iakhun teng ha ka round robin stage ha kaba ka Mawlai ka la lah ban pynrem da 1-0. Katba ka Langsning ka la ka la iaid suki ha kaba sdang jong ka samoi hynrei ka la lah ban khie khlieh hadien kane ka jingshah rem noh, kata da kaba jop ha baroh ki santylli ki jingiakhun hadien kane.

Ka jingphai khmat jong kiba bun mynta ka long na ka bynta ka jingiaknieh ia ka nam lahduh ka ban long ha ka 11 tarik sngi Saitjain hapdeng ka Mawlai SC ka lahduh jong ka samoi ba la dep pyrshah ia ka Rangdajied kaba wan ha ka kyrdan kaba ar.Kane ka jingialehkai kan sdang ha ka por 3 baje janmiet.